سوال

اگر کسی شخص پر غسل فرض ہواور وہ مسجد میں داخل ہوجائے تو اس کے لیے شریعت میں کیا حکم ہے ؟

جواب

جنابت کی حالت میں مسجد میں داخل ہونا شرعاً ممنوع ہے، اگر کوئی جنابت کی حالت میں  غسل  کیے بغیر جان بوجھ کر مسجد میں داخل ہوتا ہے تو  گناہ گار ہے، اسے اپنے اس عمل پر توبہ واستغفار کرنا چاہیے، اور آئندہ اس عمل سے اجتناب کرنا چاہیے، اور اگر کوئی شخص حالتِ جنابت میں مسجد جائے اور اسی حالت میں وہ نماز پڑھنے کو جائز سمجھے تو اسے ایمان ونکاح کی تجدید کرنی ہوگی۔ اور اگر ناجائز سمجھتے ہوئے شرم یا سستی کی وجہ سے ایسا کیا تو ایمان واسلام تو باقی رہے گا،لیکن ایسا کرنا سخت گناہ ہے، اس پر  توبہ واستغفار کرنا لازم ہے۔ البتہ اگر  مسجد سے باہر غسل کا انتظام نہ ہو ، مسجد میں ہی پانی ہو، یا غسل خانے میں جانے کے لیے مسجد سے گزرنا پڑتاہو  تو  ضرورت کے تحت مسجد میں داخل ہونے کے لیے  تیمم کرکے مسجد میں داخل ہونا جائز ہے۔
الفتاوى الهندية - (1/ 38 ،ط:رشیدیة):
"(ومنها) أنه يحرم عليهما وعلى الجنب الدخول في المسجد سواء كان للجلوس أو للعبور، هكذا في منية المصلي. وفي التهذيب: لاتدخل الحائض مسجدًا لجماعة. وفي الحجة: إلا إذا كان في المسجد ماء ولاتجد في غيره، وكذا الحكم إذا خاف الجنب أو الحائض سبعًا أو لصًّا أو بردًا فلا بأس بالمقام فيه، والأولى أن يتيمم تعظيمًا للمسجد، هكذا في التتارخانية".
فقط والله أعلم