سوال

خطبہ جمعہ سے قبل جب امام صاحب وعظ فرمارہے ہوں تو دوران وعظ اکثر لوگ اپنی تسبیحات بھی جاری رکھے ہوئے ہوتے ہیں،  اس کے بارے میں وضاحت فرمائیں !

جواب

واضح رہے   کہ خطبہ جمعہ سے قبل وعظ و نصیحت کے طور پر کی جانے  والی تقریر جمعہ کی نماز کا باقاعدہ حصہ نہیں ہے اور  نہ ہی اس کے  لیے شرعًا  خطبہ جمعہ کی مانند  کوئی خاص شرائط و قیودات لازم ہیں؛  لہذا اگر کوئی شخص دوران وعظ تسبیحات اور ذکر و اذکار میں مشغول رہے تو یہ فی نفسہ  جائز تو  ہے ،لیکن وعظ کے آداب کے خلاف ہے ، ان سامعین کو   چاہیے کہ دوران وعظ  ذکر و اذکار کو موقوف کرکے اجتماعی وعظ میں یک سوئی سے شریک ہوں   ۔

فتاوی محمودیہ میں ہے : 

"سوال :ہمارے یہاں جامع مسجد میں امام صاحب اذان کے بعد فورًا سنتوں سے پہلے وعظ و تعلیمی تقریر شروع کردیتے ہیں جس میں ضروری مسائل کی تعلیم ہوتی ہے ، یہ جائز ہے یا  نہیں ؟

الجواب حامدا ومصلیا :"امام صاحب جب تعلیمی تقریر اور دینی مسائل سمجھاتے ہیں تو اس وقت سب کو خاموش رہ کر سننا  چاہیے، یہ طریقہ حدیث شریف سے ثابت ہے ، حضرت تمیم داری رضی اللہ تعالی عنہ اور حضرت ابوہریرہ رضی اللہ عنہ کا بھی یہی معمول تھا ملا علی قاری نے اس کو نقل کیا ہے ...۔"

(فتاوی محمودیہ  ، ج:8 ،ص:256 ،ط:مکتبہ فاروقیہ )

فقط واللہ اعلم