سوال

جاز کیش اکاونٹ میں پیسے رکھنے سے فری منٹ ملتے ہیں اور یہ سود ہے، اب مسئلہ یہ ہے کہ ہم لوگ پیکیج بھی کروا لیتے ہیں، لیکن پہلے وہ فری والے منٹ ہی استعمال ہوتے ہیں اور اکاونٹ میں پیسے رکھنا بھی ضروری ہے، آپ حضرات اس کے بارے میں راہ نمائی فرما دیں کہ ہم سود کھانے کے زمرہ میں تو نہیں آتے؟ اور ہماری ان فری منٹ کے استعمال کی کوئی نیت نہیں ہے. 

جواب

واضح رہے کہ موبائل فون میں کال کرنے کی سہولت فراہم کرنے والی مختلف کمپنیوں کی جانب سے مختلف ناموں سے اکاؤنٹ کھولنے کی سہولت فراہم کی جاتی ہے، (مثلاً جاز کیش اکاؤنٹ، ٹیلی نار ایزی پیسہ اکاؤنٹ وغیرہ)، جس میں طے شدہ بیلنس  رکھنے  کی شرط پر کمپنی کی طرف سے  مختلف سہولیات اکاؤنٹ ہولڈر  کو مہیا کی جاتی ہیں؛ جیسے: فری منٹ، فری ایس ایم ایس و غیرہ۔

ایسے اکاؤنٹ کھلوانے اور اس کے ذریعہ رقم بھیجنے اور وصول کرنے  کا حکم یہ ہے کہ اگر کمپنی سے مقررہ  رقم رکھنے کی شرط پر اضافی سہولیات فراہم ہی نہیں کی جائیں تو اس صورت میں ایسا اکاؤنٹ کھلوایا جا سکتا ہے، تاہم اگر کمپنی کی طرف سے مخصوص رقم جمع کرانے کی شرط پر مقررہ سہولیات فراہم کی جاتی ہوں، چاہے کوئی لینا چاہے یا نہ چاہے تو ایسی صورت میں ایسا اکاؤنٹ درحقیقت سودی ہوتا ہے، جسے کھلوانے کی شرعاً اجازت نہیں؛ کیوں کہ کمپنی میں اکاؤنٹ ہولڈر کی جانب سے جو  رقم جمع کرائی جاتی ہے وہ کمپنی کے ذمہ قرض ہوتی ہے اور اکاؤنٹ ہولڈر جب اپنی رقم واپس لینا چاہے کمپنی رقم واپس کرنے کی پابند ہوتی ہے، اور قرض پر کسی بھی قسم کا مشروط نفع از روئے شرع سود ہونے کی وجہ سے حرام ہوتا ہے؛ لہذا صورتِ مسئولہ میں ایسا اکاؤنٹ (جیز کیش) کھلوانا جائز نہیں، چاہے فری منٹ و دیگر فراہم کردہ سہولیات سے اکاؤنٹ ہولڈر فائدہ اٹھائے یا نہ اٹھائے، اگر کسی نے ایسا اکاؤنٹ کھلوا رکھا ہے اسے فوری طور پر سچے دل سے توبہ و استغفار کرتے ہوئے مذکورہ اکاؤنٹ بند کروا دینا چاہیے۔

نیز جو فری منٹ استعمال کر چکے ہیں، کمپنی کے پیکیج کے مطابق اتنی مقدار کے منٹ جس رقم کے عوض ملتے ہوں، وہ رقم بغیر ثواب کی نیت کے مستحقِ زکوۃ کو صدقہ کردیں۔ فقط واللہ اعلم