سوال

شبِ برأت کے روزہ کو افطار کرتے وقت ایسا ہوا کہ مؤذن نے وقت سے پہلے اذان دے دی، نقشہ دائمی نماز پر وقت 6 بج کر 52 منٹ پر غروب آفتاب کا تھا جب کہ مؤذن نے اذان 6 بج کر 50 منٹ پر دی۔ اور جب بعد میں ایکسپریس اخبار کی طرف دیکھا تو وہاں غروب آفتاب کا وقت 5 بج کر 51 منٹ پر لکھا ہوا تھا۔ایک عالمِ دین سے پوچھا تو انہوں نے فرمایا کہ روزہ افطار کرنے کے لیے نا وقت کا اعتبار ہے اور نا ہی اذان کا بلکہ غروب آفتاب کا اعتبار ہے۔ اب عام بندے کو غروبِ آفتاب کا کیسے پتا چلے گا؟جب کہ آبادی بھی ہر طرف پھیلی ہوئی ہو اور سورج کے غروب ہونے کا پتا بھی نا چل سکتا ہو۔کیا اہلِ محلہ کا روزہ مکمل ہوگیا؟ یا وقت سے پہلے افطار کرنے کی صورت میں قضا لازم ہوگی؟

جواب

افطاری میں اعتبار غروبِ آفتاب کے وقت کاہے، علماءِ کرام کے مصدقہ نقشے (مثلاً: پروفیسر عبداللطیف صاحب کا تیار کردہ نقشے) سے اس کو دیکھ لیں، ہر ایک کو سورج کو دیکھنے کی ضرورت نہیں، نقشہ کو  دیکھ  لینا کافی ہے۔

 اگر مغرب کی اذان وہاں  لکھے ہوئے وقت سے پہلے دی گئی تو اس اذان کے ساتھ روزہ افطار کرنے سے روزہ فاسد ہوگیا، اس کی قضا ضروری ہے۔ فقط واللہ اعلم