سوال

مجھے اللہ پاک نے بیٹی عطا  فرمائی ہے، میں اس کا نام عزوہ فاطمہ رکھنا چاہتا ہوں، اس کا معنی کیا ہے؟ اور کیا یہ ہمارے نبی پاک کی بیٹی کا نام تھا؟ یہ نام رکھنا کیسا ہے؟ اسلامی نقطہ نظر سے تشریح فرما دیں!

جواب

عزوہ اور فاطمہ یہ دو الگ الگ نام ہیں، عزوہ کا صحیح تلفظ ع کے  کسرہ (زیر) کے ساتھ  ’’عِزوه‘‘ ہو تو اسکامعنٰی ہے: ’’منسوب کرنا، صبر کرنا‘‘  ۔

اور  ’’فاطمہ‘‘  ف ط م سے ہے، فَطَمَ فَطْماً: کاٹنا۔  المُرْضِعُ الرَّضِیْعَ: دودھ پلانے والی (دایہ) کا بچہ کا دودھ چھڑانا، ھِیَ فَاطِمٌ و فَاطِمَةٌ۔ فاطمہ کا معنی ہے: وہ عورت جس سے (اس کے) بچے کا دودھ چھڑا دیا گیا ہو۔

نیز ’’فاطمہ‘‘ رسول اللہ ﷺ کی لخت جگر اور پیاری بیٹی (فاطمہ بنت محمد ﷺ ) کا بابرکت نام ہونے کے ساتھ ساتھ بیس (20) سے زیادہ صحابیات کا بھی نام مبارک ہے، اس لیے اس نسبت سے یہ نام  رکھنا مبارك اور بڑی سعادت کی بات ہے۔

لہٰذا صورتِ مسئولہ میں آپ اپنی بچی کا نام ( عِزوہ فاطمہ) رکھ سکتے ہیں،  اس میں کوئی حرج نہیں اور فاطمہ کی وجہ سے یہ نام باعثِ برکت ہوگا۔ یہ بھی ملحوظ رہے کہ رسول اللہ ﷺ کی صاحب زادی کا نام "فاطمہ" ہے، " عزوہ"  ان کے نام کا حصہ نہیں ہے۔

الصحاح تاج اللغۃ وصحاح العربیۃ میں ہے:

"‌‌[عزا] عزوته  إلى أبيه، وعزيته لغة، إذا نسبته إليه، فاعتزى هو وتعزى، أي انتمى وانتسب".

(حرف الواو  و الياء، فصل العين، ج:6، ص:2425، ط:دار العلم للملايين)

لسان العرب میں ہے:

"عزا: العزاء: الصبر عن كل ما فقدت .... وعزا فلان نفسه إلى بني فلان يعزوها عزوا وعزا واعتزى وتعزى، كله: انتسب، صدقا أو كذبا، وانتمى إليهم مثله، والاسم العِزْوة".

(حرف الواو و الياء، فصل العين المهملمة، ج:15، ص:52، ط:دار صادر)

معجم متن اللغۃ میں ہے:

"عزاه- عزوا وعزيا إلى أبيه: نسبه إليه، وهو من حسن العِزوة والعِزية. و- إليه و- له: انتسب إليه صدقا كان أو كذبا. والاسم العِزْوة والعزاء. و- الحديث أو الكلام لفلان: أسنده إليه".

(حرف العين، ج:4، ص:98، ط:دار مكتبة الحياة)

مصباح اللغات میں ہے:

"الْعِزْوَۃُ: انتساب، صبر۔"

(حرف العین، عزی، ص:550، ط:قدیمی کتب خانہ)