سوال

اردو استخارہ کروانا ہے۔

جواب

واضح رہے کہ ہمارے  یہاں کسی کے لیے استخارہ نہیں کرایاجاتاہے، بلکہ استخارہ کا طریقہ بتلادیاجاتاہے، ویسے بھی مسنون استخارہ وہ ہے جسے کسی دوسرے سے کروانے کے بجائے انسان خود کرے، جیسا کہ احادیث سے معلوم ہوتاہے کہ  نبی کریم صلی اللہ علیہ وسلم صحابہ کرام رضی اللہ عنہم کو استخارہ کا طریقہ اس اہتمام سے تعلیم فرماتے تھے  جیسے  قرآنِ کریم کی سورت یا آیت کی تعلیم دے رہے ہوں، اور صحابۂ کرام رضی اللہ عنہم کی زندگی سے بھی یہ بات معلوم ہوتی ہے کہ وہ حضور اقدس صلی اللہ علیہ وسلم سے اپنے امور میں مشورہ تو لیتے تھے، لیکن آپ صلی اللہ علیہ وسلم سے ’’استخارہ‘‘  نہیں کرواتے تھے، حال آں کہ نبی کریم صلی اللہ علیہ وسلم سے مقدس وبرگزیدہ کوئی انسان نہیں، نیز اس وقت وحی بھی نازل ہوتی تھی جس کی روشنی میں خیر وشر یقینی طورپر معلوم ہوسکتاتھا، لیکن اس کے باوجود صحابہ کرام رضوان اللہ علیہم اجمعین نے نہ کبھی نبی کریم صلی اللہ علیہ وسلم سے اپنے لیے استخارہ کروایا اور نہ ہی کسی اور کے لیے رسولِ اکرم صلی اللہ علیہ وسلم نے استخارہ کیا، پس رسولِ اکرم صلی اللہ علیہ وسلم نے صحابہ کرام رضوان اللہ علیہم اجمعین کے ذریعہ  آنے والی پوری امت کی تربیت اس نہج پر فرمائی کہ امت کا ہر فرد اللہ تعالیٰ سے خود تعلق قائم کرے، اور مہربان رب سے ہر شخص اپنی حاجت مانگنے کے ساتھ خود ہی خیر کا خواست گار ہو۔

لہٰذا سنت طریقہ یہی ہے کہ صاحبِ  معاملہ خود استخارہ کرے ، اسی میں برکت  ہے۔ 

استخارہ  سے متعلق تفصیلی راہ نمائی کے لیے "استخارہ سنت کے مطابق کیجیے" کتاب کا مطالعہ مفید رہے گا، جس کو درج ذیل لنک سے بھی ڈاؤن لوڈ کیا جاسکتا ہے:

استخارہ سنت کے مطابق کیجئے

سنن ترمذی میں ہے:

"عن جابر بن عبد الله، قال: كان رسول الله صلى الله عليه وسلم يعلمنا الاستخارة في الأمور كلها كما يعلمنا السورة من القرآن، يقول: إذا هم أحدكم بالأمر فليركع ركعتين من غير الفريضة، ثم ليقل: اللهم إني أستخيرك بعلمك، وأستقدرك بقدرتك، وأسألك من فضلك العظيم، فإنك تقدر ولا أقدر، وتعلم ولا أعلم، وأنت علام الغيوب، اللهم إن كنت تعلم أن هذا الأمر خير لي في ديني ومعيشتي وعاقبة أمري، أو قال: في عاجل أمري وآجله، فيسره لي، ثم بارك لي فيه، وإن كنت تعلم أن هذا الأمر شر لي في ديني ومعيشتي وعاقبة أمري، أو قال: في عاجل أمري وآجله، فاصرفه عني، واصرفني عنه، واقدر لي الخير حيث كان، ثم أرضني به، قال: ويسمي حاجته".

(ج:1، ص:604، ط: دار الغرب الإسلامی)

فقط والله أعلم