سوال

عمر کی ایک دکان ہے، اور  عمر کے پاس بارہ لاکھ روپے ہیں،  اب وہ اس دوکان میں  کاروبار کرنے کے لیے   اپنے بارہ لاکھ  روپے لگا دیتا ہے، یعنی دکان  میں فروخت کرنے کے لیے  سامان خرید تا ہے، لیکن وہ سامان کم ہے، اور اس کو مزید سامان کی ضرورت ہے،لہذامزید سامان خریدنے کے لیے ،وہ زید سے کہتا ہے کہ: "آپ مجھے تین لاکھ روپے دےدو "میں اس سے  سامان خریدتا ہوں، اور آپ کو ہر مہینے میں نفع دوں گا،چار، پانچ یا چھ ہزار جب کہ  بعد میں عمر زید کو اس کے تین لاکھ روپے بھی واپس کرے گا، تو کیا عمر کے لیے اس طرح کرنا جائز ہے؟

جواب

صورت مسئولہ میں  اگر   عمر زید سے تین لاکھ روپے قرض لے کر ہر ماہ اس کو چار، پانچ یا چھ ہزارنفع دے گا، تو ایسی صورت میں نفع سود ہوگا، اور مذکورہ معاملہ ناجائز ہوگا، اور اگر  عمر زید سے تین لاکھ روپے بطورمضاربت لے رہا  ہے،تو منافع کے  4/5/6 ہزار متعین ہونے کے سبب ،مذکورہ معاملہ جائز نہیں ہوگا، اور اس طرح منافع دینا بھی سود ہے۔

لہذا  شرعا صحیح صورت یہ ہے کہ عمر زید سے تین لاکھ  بطورمضاربت لے، پھر اس رقم سے باہمی مشورے سے  مخصوص اشیاء خرید لے، پھر ان مخصوص اشیاء کو بیچنے کی صورت میں جو نفع ہو،اس نفع سے زید اور عمر فیصدی اعتبار سے تناسب طے کرلیں، نیز اس صورت میں نفع میں زید اور عمر دونوں شریک ہوں گے مقررہ تناسب کے اعتبار سے۔ البتہ  نقصان  ہونے کی صورت میں پہلے نقصان  نفع سے پورا کیا جاۓ گا، اگر نفع  سے بھی نقصان کا ازالہ  نہ ہوا تو اصل سرمایہ کی طرف رجوع کیا جاۓ گا ۔

قرآن کریم میں ہے:

{وَاَحَلَّ اللّٰهُ الْبَیْعَ وَحَرَّمَ الرِّبٰوا}[البقرہ۲۷۵]

ترجمہ:اللہ تعالیٰ نے خرید و فروخت کو حلال اور سود کو حرام قرار دیا ہے۔

{ یَمْحَقُ اللّٰهُ الرِّبَا وَیُرْبِی الصَّدَقَاتِ}[البقرہ۲۷۶]

ترجمہ:اللہ تعالیٰ سود کو مٹاتا ہے اور صدقات کو بڑھاتا ہے۔

{یَا أَیُّهَا الَّذِیْنَ أٰمَنُوْا اتَّقُوْا اللّٰهَ وَذَرُوْا مَابَقِیَ مِنَ الرِّبوٰ إِنْ كُنْتُمْ مُّؤْمِنِیْنَ، فَإِنْ لَّمْ تَفْعَلُوْا فَأْذَنُوْا بِحَرْبٍ مِّنَ اللّٰهِ وَرَسُوْلِه} [البقرۃ:۲۷۸،۲۷۹]

ترجمہ:اے ایمان والو! اللہ سے ڈرو اور جو کچھ سود کا بقایا ہے اس کو چھوڑدو، اگر تم ایمان والے ہو، پھر اگر تم اس پر عمل نہیں کروگے تو اشتہار سن لو جنگ کا اللہ کی طرف سے اور اس کے رسول ﷺ کی طرف سے۔ [بیان القرآن]

حدیث شریف میں ہے:

"عن جابر، قال: «لعن رسول الله صلى الله عليه وسلم آكل الربا، ومؤكله، وكاتبه، وشاهديه»، وقال: «هم سواء»".

(صحیح مسلم، باب لعن آکل الربوٰ و موکله، 1219/3 ط:داراحیاءالتراث العربی)

ترجمہ:حضرت جابر رضی اللہ عنہ سے روایت ہے کہ اللہ کے رسول ﷺ نے لعنت بھیجی ہے سود کھانے والےپر، سود کھلانے والے پر، سودی معاملہ کے لکھنے والے پر اور سودی معاملہ میں گواہ بننے والوں پر اور ارشاد فرمایا کہ یہ سب (سود کے گناہ میں )برابر ہیں۔

فتاوی شامی میں ہے:

"( كلّ قرض جرّ نفعًا حرام) أي إذا كان مشروطًا كما علم مما نقله عن البحر".

(کتاب البیوع،باب المرابحة و التولية، فصل فی القرض ،مطلب كل قرض جر نفعا حرام،166/5،ط: سعيد)

البحرالرائق میں ہے:

"(قوله وتفسد إن شرط لأحدهما دراهم مسماة من الربح) ؛ لأنه شرط يوجب انقطاع حق الشركة فعساه لا يخرج إلا القدر المسمى لأحدهما."

(كتاب الشركة ،ما تبطل به شركة العنان،ج:191/5،ط:دارالکتاب الاسلامى)