کیا معتکف کا واٹس ایپ کے ذریعہ بیوی سے بات کرنا جائز ہے؟ اسی طرح فون سے بات کرناجائز ہے؟
اعتکاف کا مقصد اللہ تعالی کا قرب حاصل کرنا اور اس کی عبادت میں مشغول رہنا ہے، دنیا سے حتی الامکان کٹ کر اللہ تعالیٰ سے لَو لگانا ہے، لہذا معتکف کو چاہیے کہ وہ نماز، تلاوت، ذکر و اذکار، تعلیم و تعلم اور دیگر عبادات میں اپنا زیادہ وقت گزارے، تاہم ضرورت کے وقت اپنی بیوی یا کسی اور شخص سے بذریعہ فون یا میسج گفتگو کرے تو اس کی اجازت ہے، بلاضرورت طویل بات چیت نہ کرے۔
اعتکاف میں انٹرنیٹ اور واٹس ایپ استعمال کرنے سے حتی الامکان احتراز کیا جائے؛ کیوں کہ اس میں جان دار کی تصاویر سے بچنا بہت مشکل تقریباً ناممکن ہے، اس سے مسجد کی بے ادبی کے ساتھ اعتکاف کے دوران گناہ بھی ہوگا، لیکن اگر کسی شخص نے اعتکاف کے دوران واٹس ایپ استعمال کیا تو اس کا اعتکاف نہیں ٹوٹے گا، البتہ اگر اس دوران جان دار کی تصاویر یا ویڈیو دیکھی ہوں تو توبہ و استغفار کرے۔ فقط و اللہ ا علم
فتوی نمبر : 144109201298
دارالافتاء : جامعہ علوم اسلامیہ علامہ محمد یوسف بنوری ٹاؤن