سوال

 حال ہی میں حکومت پاکستان نے ایک ہاؤسنگ اسکیم کے نام سے قرض دینا شروع کیا ہے، لیکن جب میں نے میزان بینک سے رابطہ کیا؛ کیوں کہ وہ سود سے پاک بینک تھا تو انہوں نے بھی یہی کہا کہ  اس میں سود ہے،کیوں کہ یہ حکومت پاکستان کی طرف سے عوام کو ہلکی شرائط پر قرض اسکیم ہے،  تو  برائے مہربانی کیا وہ قرض لینا درست ہے یا نہیں ؟ ہم سود لینا اور دینا نہیں  چاہتے،  لیکن  یہ حکومت کی طرف سے ہے۔

جواب

واضح رہے  کہ مروجہ غیرسودی بینکوں  سے متعلق ہماری تحقیق اور  بہت سے مقتدر علماءِ کرام  کی رائے یہ ہے کہ  ان  بینکوں کا طریقِ کار شرعی اصولوں کے مطابق نہیں ہے،  اور مروجہ غیر سودی بینک اور  روایتی بینک کے بہت سے  معاملات  تقریباً  ایک جیسے ہیں، لہذا روایتی بینکوں کی طرح ان سے بھی  تمویلی معاملات کرنا سے اجتناب کرنا لازم ہے۔

صورتِ  مسئولہ میں  حکومت کی طرف سے حالیہ ہاؤسنگ اسکیم کے تحت قرض لینا شرعًا جائز نہیں ہے، خواہ وہ عام بینک سے لیا جائے یا کسی مروجہ غیر سودی بینک سے، سودی بینک سے سودی قرض لینے کا عدمِ جواز تو واضح ہے، اسی طرح میزان بینک سمیت دیگر موجودہ اسلامک بینکوں سے گھر خریدنے کے لیے قرضہ لینا بھی شرعاً جائز نہیں ہے؛  کیوں کہ   یہ   اصطلاح میں "شرکتِ متناقصہ "کے تحت  جاری ہوتا ہے اور اس معاملے میں بہت سے شرعی اصولوں کی خلاف ورزی لازم آتی ہے، مثلاً ایک ہی معاملے میں  كئي عقود (بیع، شرکت اور اجارہ) کو جمع کرنا اور عملاً ایک دوسرے کے لیے شرط قرار دینا وغیرہ۔

نیز  جس طرح عام لوگوں سے سودی لین دین جائز نہیں ہے، اسی طرح حکومت سے بھی سودی معاملہ کرنا جائز نہیں ہے ۔

 اگر آپ  کے پاس  فی الحال اتنی رقم نہیں ہے جس سے آپ ذاتی مکان مذکورہ اسکیم کے تحت خرید سکیں اور قسطوں پر خریدنے کی بھی کوئی جائز صورت نہ بن سکے تو بھی آپ کے لیے مذکورہ بینک سے قرضہ لینے کی اجازت نہیں ہے، اگر  کسی سے غیر سودی قرض مل جائے تو آدمی لے لے، بصورتِ دیگر مکان خریدنے کے لیے رقم جمع کرنا شروع کر دے اور  جب تک رقم جمع نہ ہو جائے اُس وقت تک اپنی حیثیت کے مطابق کرایہ کے مکان میں رہے، شرعی حدود میں رہ کر کفایت شعاری سے کام لے، پھر جب پیسے جمع ہو جائیں تو اُن پیسوں سے مکان خرید لے۔

نیز اس دوران جو تکالیف آئیں ان پر صبر کرنا چاہیے؛ کیوں کہ مؤمن کی نظر اللہ تعالیٰ کی رضا اور آخرت پر ہوتی ہے، اللہ تعالیٰ جس حال میں راضی ہوں اور جس عمل کے نتیجے میں آخرت کی لازوال نعمتوں کا وعدہ ہو اسے مدِ نظر رکھتے ہوئے ان شاء اللہ دنیا کے مصائب ہیچ معلوم ہوں گے۔

قرآنِ کریم میں ہے:

﴿ يَا أَيُّهَا الَّذِيْنَ آمَنُوا اتَّقُوا اللهَ  وَذَرُوْا مَا بَقِيَ مِنَ الرِّبَا إِنْ كُنْتُمْ مُؤْمِنِيْنَ فَإِنْ لَّمْ تَفْعَلُوْا فَأْذَنُوْا بِحَرْبٍ مِّنَ اللهِ وَرَسُوْلِه وَإِنْ تُبْتُمْ فَلَكُمْ رُءُوْسُ أَمْوَالِكُمْ لَاتَظْلِمُوْنَ وَلَا تُظْلَمُوْنَ وَإِنْ كَانَ ذُوْ عُسْرَةٍ فَنَظِرَة إِلٰى مَيْسَرَةٍ وَأَنْ تَصَدَّقُوْا خَيْر لَّكُمْ إِنْ كُنْتُمْ تَعْلَمُوْنَ﴾ [البقرة : ۲۷۸ إلى ۲۸٠ ]

ترجمہ: اے ایمان والو! اللہ سے ڈرو اور جو کچھ سود کا بقایاہے اس کو چھوڑ دو اگر تم ایمان والے ہو، پھر اگرتم نہ کرو گے تو اشتہار سن لو جنگ کا اللہ کی طرف سے اور اس کے رسول کی طرف سے۔ اور اگر تم توبہ کرلوگے تو تم کو تمہارے اصل اموال مل جائیں گے، نہ تم کسی پر ظلم کرنے پاؤ گے اور نہ تم پر ظلم کرنے پائے گا، اور اگر تنگ دست ہو تو مہلت دینے کا حکم ہے آسودگی تک، اور یہ کہ معاف ہی کردو  زیادہ بہتر ہے تمہارے لیے اگر تم کو خبر ہو۔

حدیث شریف میں ہے:

عَنْ سَعِيدِ بْنِ عُمَيْرٍ الْأَنْصَارِيِّ، قَالَ: سُئِلَ رَسُولُ اللهِ صَلَّى اللَّهُ عَلَيْهِ وَسَلَّمَ أَيُّ الْكَسْبِ أَطْيَبُ؟ قَالَ: " عَمَلُ الرَّجُلِ بِيَدِهِ، وَكُلُّ بَيْعٍ مَبْرُورٍ. (شعب الإيمان (2/ 434)

ترجمہ:آپ  ﷺ  سے پوچھا گیا  کہ سب سے پاکیزہ کمائی کو ن سی ہے؟ تو آپ ﷺنے فرمایا کہ  آدمی کا  خود  اپنے ہاتھ سے محنت کرنا اور ہر جائز اور مقبول بیع۔

  "فتاوی شامی" میں ہے:

"وفي الأشباه: كل قرض جر نفعاًحرام، فكره للمرتهن سكنى المرهونة بإذن الراهن".  

(5/166، مطلب کل قرض جر نفعا، ط: سعید)

فقط واللہ اعلم