سوال

ایک شخص کے پاس کل آمدنی حرام ہو تو کیا:

1- اس حرام مال میں اس کی ملکیت ثابت ہوگی یا نہیں؟

2-ایسے شخص پر زکات و قربانی واجب ہوگی یا نہیں؟

جواب

1-حرام آمدنی کے بہت سارے ذرائع ہیں، مثلا غصب، چوری، ڈکیتی، سود، جوا، رشوت وغیرہ سب حرام آمدنی کے ذرائع ہیں، ملکیت ثابت ہونے نہ ہونے میں سب کا حکم یکساں نہیں ہے، بعض میں ملکیت ثابت ہوجاتی ہے، جبکہ بعض میں نہیں ہوتی، اور ملکیت ثابت ہونے کی حیثیت بھی مختلف ہوتی  ہے،  اس لیے  جس سے متعلق سوال کرنا مقصود ہے اس کی وضاحت لکھ کر دو بارہ سوال پوچھا جائے۔

2-جس شخص کی کل آمدنی حرام ہو اس پر اس حرام مال کی وجہ سے زکات و قربانی واجب نہیں ہیں؛ کیوں کہ مالِ حرام کا اگر مالک معلوم ہو تو اس کو واپس کرنا واجب ہے، اگر معلوم نہ ہو تو بلا نیت ثواب صدقہ کرنا واجب ہے۔

فتاویٰ شامی میں ہے:

"قوله: كما لو كان الكل خبيثا) في القنية لو كان الخبيث نصابا لا يلزمه الزكاة؛ لأن الكل واجب التصدق عليه فلا يفيد إيجاب التصدق ببعضه. اهـ

قدمنا عن القنية والبزازية أن ما وجب التصدق بكله لا يفيد التصدق ببعضه؛ لأن المغصوب إن علمت أصحابه أو ورثتهم وجب رده عليهم وإلا وجب التصدق به."

(كتاب الزكاة، باب زكاة الغنم، ج:2، ص:291، ط:سعيد)

فقط والله اعلم