سوال

میرا ایک بیٹا ہے ، میرے شوہر کی بہن نے اس کو اپنا دودھ چمچ کے ذریعے پلایا ہے، اور میرے شوہر کی بہن کے بیٹے کو میں نے دودھ پلایاہے،میرا ایک اور بیٹا ہے، جس کو میرے شوہر کی بہن نے دودھ نہیں پلایا، میں اپنے شوہر کی بہن کی بیٹی سے اس کا نکاح کرانا چاہتی ہوں، اس لڑکی کوبھی میں نے دودھ نہیں پلایا۔

کیا ان دونوں کا آپس میں نکاح جائز ہے ؟

جواب

صورت مسئولہ میں آپ کا وہ بیٹا جسے آپ کے شوہر کی بہن نے دودھ نہیں پلایا اور آپ کے شوہر کی بہن کی بیٹی جسے آپ نے دودھ نہیں پلایا، ان دونوں کا آپس میں نکاح درست ہے ، اس لیے کہ یہ دونوں ایک دوسرے کے لیے اجنبی ہیں۔

البحرالرائق میں ہے :

"قوله ( وتحل أخت أخيه رضاعا ) يصح اتصاله بكل من المضاف والمضاف إليه وبهما كما قدمناه في نظائره فالأول أن يكون له أخ من النسب ولهذا الأخ أخت رضاعية والثاني أن يكون له أخ من الرضاع له أخت نسبية."

(البحرالرائق، کتاب الرضاع، ج:۳،ص:۲۴۴،ط:دارالمعرفۃ)

فتاوی شامی میں ہے :

"(وتحل أخت أخيه رضاعا) يصح اتصاله بالمضاف كأن يكون له أخ نسبي له أخت رضاعية."

(فتاوی شامی ، باب الرضاع، ج:۳،ص:۲۱۷،ط:سعید)

فقط واللہ اعلم