سوال

شوہر نے بیوی کو صریح الفاظ میں طلاق دے دی، وہ تو ہوجائے گی، جب اس کو طلاق ہوئی اس وقت وہ ایام میں تھی، تو کتنی عدت گزارے گی؟

جواب

حالتِ حیض میں طلاق دینا مکروہِ تحریمی اور ناجائز ہے، فقہ حنفی میں اس کو "طلاقِ بدعی" کہا جاتا ہے، یعنی وہ طلاق جو سنت کے خلاف ہے، کیوں کہ رسول اللہ ﷺ نے حالتِ حیض میں طلاق دینے سے منع فرمایا ہے،لیکن اگر کوئی شخص اپنی بیوی کو حالت حیض میں طلاق دے دے تو طلاق واقع ہوجاتی ہے  اور اگر ایک یا دو طلاقِ رجعی دی ہوں تو گناہ کی تلافی کے لیے رجوع کرنا چاہیے، اگر رجوع نہیں کیا تو جس حیض میں طلاق دی گئی ہے وہ حیض عدت میں شمار نہیں ہوگا، اس کے بعد کامل تین حیض عدت ہوں گے۔

وفي الفتاوى الهندية :

" (والبدعي) من حيث الوقت أن يطلق المدخول بها وهي من ذوات الأقراء في حالة الحيض أو في طهر جامعها فيه وكان الطلاق واقعا ويستحب له أن يراجعها والأصح أن الرجعة واجبة هكذا في الكافي."

(کتاب الطلاق ج نمبر ۱ ص نمبر ۳۴،دار الفکر)

وفيه أيضًا:

"إذا طلق امرأته في حالة الحيض كان عليها الاعتداد بثلاث حيض كوامل ولاتحتسب هذه الحيضة من العدة، كذا في الظهيرية". (1 / 527ط:دار الفكر)

فقط واللہ اعلم