سوال

 زید نے گوگل ایڈ سیکھا ہوا ہے ، یعنی وہ گوگل پر پیسے ادا کرکے اپنے پروڈکٹ کی تشہیر کرنا جانتا ہے ، لیکن بکر یہ نہیں جانتا ، اب بکر کو اپنے پروڈکٹ کی گوگل پر تشہیر کرانی ہے، تو زید اسے آفر کرتا ہے ، کہ میں تمہارا یہ کام بخوبی کر سکتا ہوں لیکن میں فیس وصول کروں گا، تو معلوم یہ کرنا ہے کہ گوگل پر اشتہارات چلانے کے عوض زید کا فیس وصول کرنا جائز ہے یا نہیں ۔ 

جواب

گوگل کی طرف سے لگائے جانے والے  اشتہار ات میں جاندار کی تصاویر، میوزک  سمیت بے شمار خرابیاں پائی جاتی ہیں، نیز ویب سائٹ بناتے وقت گوگل انتظامیہ کو جب ایڈ چلانے کی اجازت دی جائے تو اس کے بعد وہ  مختلف ڈیوائسز کی سرچنگ بیس یا لوکیشن یا ملکوں کے حساب سے مختلف ایڈ چلاتے ہیں، مثلاً اگر  پاکستان میں اسی ویڈیو پر وہ کوئی اشتہار چلاتے ہیں، مغربی ممالک میں اس پر وہ کسی اور قسم کا اشتہار چلاتے ہیں،  اور پاکستان میں ہی ایک شخص کی ڈیوائس پر الگ اشتہار  چلتاہے تو دوسرے شخص کی ڈیوائس پر دوسری نوعیت کا اشتہار چل سکتاہے، جس   میں اکثر  حرام اور  ناجائز چیزوں کی تشہیر پر مشتمل اشتہارات ہوتے ہیں ، ان مفاسد کے پیشِ نظر ویب سائٹ پر اشتہار نشر کرکے پیسے کمانا ا ورفیس لینا شرعًا جائز نہیں ہے۔

فتاوى هندية میں ہے:

"ومنها أن يكون مقدور الاستيفاء - حقيقة أو شرعًا فلايجوز استئجار الآبق ولا الاستئجار على المعاصي؛ لأنه استئجار على منفعة غير مقدورة الاستيفاء شرعا.... ومنها أن تكون المنفعة مقصودة معتادًا استيفاؤها بعقد الإجارة و لايجري بها التعامل بين الناس فلايجوز استئجار الأشجار لتجفيف الثياب عليها. .... ومنها أن تكون الأجرة معلومةً."

(کتاب الاجارۃ ج :4ص:411،دار الفکر)

فتاوی شامي ميں ہے:

"(لا تصح الإجارة لعسب ‌التيس) وهو نزوه على الإناث (و) لا (لأجل المعاصي مثل الغناء والنوح والملاهي)".

(کتاب الجارۃ ، باب الاجارۃ الفاسدۃ، ج:6،  ص:55،  ط:سعید)

وفیہ ایضاً:

"قال ابن مسعود: صوت اللهو والغناء ينبت النفاق في القلب كما ينبت الماء النبات. قلت: و في البزازية: إستماع صوت الملاهي كضرب قصب و نحوه حرام ؛لقوله عليه الصلاة والسلام: استماع الملاهي معصية، و الجلوس عليها فسق، والتلذذ بها كفر؛ أي بالنعمة".

(ج:6،ص:348، ط: سعيد)

فقط واللہ اعلم