اگر جانور کو شرعی طریقے سے ذبح کیا جائے تو اس کےگوشت کو بغیر دھوئے کھا سکتے ہیں؟ خصوصاً وہ گوشت جو لوتھڑا ہو ، جس میں ہڈی نہ ہو ۔
اگر گوشت کسی حلال جانور کا ہو اور ذبح بھی حلال طریقہ سے ہی کیا گیا ہو تو اس کا گوشت حلال ہے، اسے پکائے بغیر اور دھوئے بغیر کھا سکتے ہیں بشرطیکہ اس پر کوئی ناپاکی نہ لگی ہو، ( مثلاً نجاست یا دمِ مسفوح یعنی بوقتِ ذبح بہنے والا خون ) ۔ نجاست یا دمِ مسفوح لگے ہونے کی صورت میں گوشت کو دھو کر پاک کرنا ضروری ہوگا۔
کفایت المفتی میں ہے:
" گوشت کچا کھانا جائز ہے، پکانا حلت کی شرط نہیں ہے ۔ محمد کفایت اللہ کان اللہ لہ۔"
(کفایت المفتی جلد 8)
المحيط البرهاني في الفقه النعماني (1/ 189)
"وفي عيون المسائل: الدم الملتزق باللحم إن كان ملتزقاً من الدم السائل بعدما سال كان نجساً، وإن لم يكن ملتزقاً من الدم السائل لم يكن نجساً."
کبیری میں ہے:
"ما لزق من الدم السائل باللحم فهو نجس، وما بقي في اللحم والعروق من الدم الغیر السائل فلیس بنجس."
(ص:195، فصل في الآسار، سهیل أکادمي)
فقط واللہ اعلم
فتوی نمبر : 144203200063
دارالافتاء : جامعہ علوم اسلامیہ علامہ محمد یوسف بنوری ٹاؤن
