سوال

گھر میں جمعہ نماز درست ہونے کے لیے پانچوں نمازوں کا وہاں ہونا ضروری ہے یا نہیں؟

جواب

واضح رہے کہ نمازِ جمعہ کا قیام شعائرِ اسلام میں سے ہے، اس میں مسلمانوں کی شان و شوکت کا اظہار ہوتا ہے، مسلمانوں کا جتنا بڑا مجمع جمع ہوکر خشوع و خضوع سے عبادت اور دعا کرتاہے، اللہ تعالیٰ ان کی دعائیں بھی قبول فرماتے ہیں اور اپنی رحمت بھی نازل فرماتے ہیں، اور ساتھ ساتھ اس سے  شیطان مزید رسوا ہوتاہے۔ اس لیے عمومی اَحوال میں تو جمعہ کی نماز جامع مسجد میں ہی پڑھنا افضل ہے، بلاعذر گھروں میں جمعہ قائم کرنا مکروہ ہے۔

البتہ  اگر  کسی ناگہانی صورتِ حال میں مساجد بالکلیہ بند ہوں یا مساجد میں جمعہ قائم کرنا ممکن نہ ہو تو پھر مساجد کے علاوہ شہر یا بڑی بستی میں جہاں چار یا چار سے زیادہ بالغ مرد جمع ہوسکیں، وہاں اذنِ عام (یعنی نماز پڑھنے والوں کی طرف سے دوسرے لوگوں کی شرکت کی ممانعت نہ ہو) کا خیال رکھتے ہوئے  جمعہ قائم کرنے کی کوشش ضرور کی جائے، اور جس جگہ نمازِ جمعہ ادا کی جارہی ہو وہاں کا دروازہ کھلا رکھیں؛ تاکہ اگر کوئی نماز میں شریک ہونا چاہے تو شریک ہوسکے۔ جمعہ کی نماز ادا کرنے کے لیے مسجد کا ہونا شرط نہیں ہے، لہٰذا اگر جمعہ کی نماز کسی گھر میں بھی ادا کی جائے تو جمعہ کی نماز ادا ہوجائے گی چاہے وہاں دوسری نمازیں پڑھی جاتی ہوں یا نہ  پڑھی جاتی ہوں۔ فقط واللہ اعلم