سوال

اگر کوئی شخص نیٹ پرمحض کسی دوسری عورت کو دھوکا  دینے کے لیے اپنی سی وی میں اپنا نام بھی غلط  لکھے اور اسی  غلط نام والی سی وی میں بیوی کے کالم میں مطلقہ لکھے تو کیا اس سے اس کی بیوی پر طلاق واقع ہو جائے گی؟

جواب

سائل کے سوال کے جواب سے پہلے یہ واضح رہے کہ کسی بھی شخص کے لیے غیر محرم سے ضرورت کے بغیر بات چیت کرنا شرعًا منع ہے، لہٰذا مستقل رابطہ رکھنا اور بے تکلف ہونا بدرجہ اولیٰ ممنوع ہوگا۔ اور  غلط بیانی اور دھوکا دہی دونوں  ہی مستقل گناہ ہیں، لہٰذا مذکورہ شخص کو اپنے ان گناہوں پر سچے دل سے توبہ کرنا چاہیے، اور آئندہ غیر محارم سے رابطہ بالکل ختم کردینا چاہیے، اور آئندہ کسی سے بھی جھوٹ کہنے اور کسی کو دھوکا دینے سے احتراز کرنا چاہیے۔

بصورتِ مسئولہ اگر  غلط  نام  سے جعلی سی  وی  بناکر اس میں بیوی کو مطلقہ ظاہر کیا جائے تو اس سے مذکورہ شخص کی اصل بیوی پر طلاق واقع نہیں ہوگی؛  کیوں کہ سی وی میں جس شخص کا نام ہے اس کی بیوی کو مطلقہ ظاہر کیا گیا ہے، جب کہ اس شخص کا یہ نام ہے ہی نہیں تو اس سے اس کی بیوی پر طلاق واقع نہیں ہوگی ۔

تاہم طلاق وغیرہ شرعی اَحکام ہیں،   قرآنِ مجید اور اَحادیثِ مبارکہ میں انہیں مذاق اور کھیل بنانے سے منع کیا گیا ہے، اور اس پر رسول اللہ ﷺ سخت ناراض ہوئے ہیں؛ لہٰذا آئندہ اس حوالے سے بھی گفتگو میں احتیاط کرنا چاہیے۔ فقط واللہ اعلم