سوال

 ایزی پیسہ ایپ سے پیکج لگوانے پر اگر فی الفور اس کی قیمت ادا کریں تو اس کی قیمت ایک ہے اگر بعد میں ادا کریں تو اس کی قیمت کچھ اور ہے، مثلا پیکج کی قیمت 500 روپے ہے اگر اس کی قیمت بعد میں ادا کریں تو اس کی قیمت 540 روپے ہے وہ وقت کو مقرر کر دیتا ہے مثلا 7 دن یا 14 دن کے اندر اس کا قیمت ادا کرے اگر مقررہ وقت پر ادا نہیں کیا تو اس پر جرمانہ عائد کریں گے۔

جواب

صورتِ مسئولہ میں مذکورہ معاملہ میں  ادھار کی صورت میں موبائل پیکج کی اصل رقم سے زائد رقم وصول کرنا جائز نہیں ، لہذا  ادھار پر زائد رقم کے  ساتھ موبائل پیکج کرنا شرعاً ناجائز ہے۔

صحیح مسلم میں ہے:

" عن ‌جابر قال: لعن رسول الله صلى الله عليه وسلم آكل الربا ومؤكله، وكاتبه وشاهديه، وقال: هم سواء ".

ترجمہ: حضرت جابر رضی اللہ عنہ سے روایت ہے کہ اللہ کے رسول صلی اللہ علیہ وسلم نے سود کھانے والے،کھلانے والے،سود کا معاملہ لکھنے والے اور اس پر گواہ بننے والوں پر لعنت بھیجی ہے،اور فرمایا : یہ سب(گناہ میں) برابر ہیں."  

(‌‌‌‌كتاب البيوع، باب لعن آكل الربا ومؤكله، 5/ 50، ط : دار الطباعة العامرة)

الدر المختار میں ہے:

"وفي الأشباه كل قرض جر نفعا حرام".

وفي الرد:

"(قوله كل قرض جر نفعا حرام) أي إذا كان مشروطا كما علم مما نقله عن البحر، وعن الخلاصة وفي الذخيرة وإن لم يكن النفع مشروطا في القرض، فعلى قول الكرخي لا بأس به".

(‌‌‌‌كتاب البيوع، باب المرابحة والتولية، فصل في القرض، مطلب كل قرض جر نفعا حرام، 5/ 166، ط: سعيد)

فقط واللہ اعلم