سوال

’’درود تنجینا‘‘  کے پڑھنے کو بعض حضرات بدعت کہتے ہیں،  کیا واقعی اس درود کو پڑھنا بدعت ہے؟ احادیثِ مبارکہ سے جو درود ثابت ہیں ان کے علاوہ  کوئی بھی درود کسی بھی زبان میں پڑھنا درست ہے یا نہیں؟

جواب

واضح رہے کہ نفسِ درود پڑھنا جب کہ وہ درست الفاظ پر مشتمل ہو ایک عبادت ہے اور ان الفاظ سے درود پڑھنا جو احادیثِ مبارکہ میں مروی ہیں، زیادہ بہتر ہے، البتہ اگر ایسے الفاظ سے درود پڑھا جائے جو احادیث میں مروی نہ ہوں اور ان الفاظ کا حدیث میں مروی ہونے کا اعتقاد نہ ہو تو اسے پڑھنا جائز ہے، بدعت نہیں ہے۔

’’درودِ تنجینا‘‘ کے الفاظ کو حدیث سے ثابت شدہ نہیں کہا جاتا، نیز آپ ﷺ کے وسیلے سے دعا کرنا صحیح احادیث میں ثابت ہے، اور درودِ پاک پڑھنے سے مشکلات کا حل ہونا بھی حدیث سے ثابت ہے، لہٰذا اس درود کے مضمون کو غیر ثابت نہیں کہا جاسکتا، بہر حال یہ درود پڑھنا بدعت نہیں ہے۔ فقط واللہ اعلم