سوال

دومنزلہ مسجد میں معتکفین کاقیام دوسری منزل میں ہوتاہے، جب کہ نماز نچلی منزل میں، اور معتکفین کی نماز کے لیے آمدورفت جس سیڑھی سے ہوتی ہے وہ مسجد سے خارج ہے، اس صورت کاکیاحکم ہے؟

جواب

اگر معتکفین مسجد کی دوسری منزل پر اعتکاف کر رہے ہیں اور مسجد کی سیڑھی جس سے معتکفین کی آمد و رفت ہوتی ہے وہ مسجد سے باہر ہے تو معتکفین کے لیے باجماعت نماز کے لیے اوپر کی منزل سے نیچے آنا جائز نہیں، اگر وہ صرف نماز پڑھنے کے لیے اوپر کی منزل سے نچلی منزل پر آئیں گے تو ان کا اعتکاف ٹوٹ جائے گا۔

اگر وہ قضائے حاجت یا وضو بنانے کےلیے اوپر کی منزل میں مسجد  کی حدود سے باہر نکل گئے اور نچلی منزل پر نماز پڑھنے کے لیے آئے تو اعتکاف نہیں ٹوٹے گا، لیکن اب ان کے لیے صرف اپنے معتکف جانے کے لیے باہر نکلنا جائز نہیں، اگر وہ باہر نکلیں گےتو  ان کااعتکاف ٹوٹ جائے گا، تاہم اگر وہ دوبارہ قضائے حاجت  یا وضو بنانے کے لیے نکلیں اور پھر اوپر کی منزل پر چلے جائیں تو ان کا اعتکاف نہیں ٹوٹے گا، اس لیے ایسی مسجد میں اعتکاف کرنے ولے اعتکاف مسجد کے اس حصہ میں کریں جہاں باجماعت نماز کی ادائیگی ممکن ہو۔فقط و اللہ اعلم