سوال

دودھ  کی دکان والا باڑے والے سے دودھ کلو کے حساب سے خریدتا ہے،  جو چالیس کلو میں 37 لیٹر بنتاہے،  اب اگر دکان پر لیٹر کے حساب سے دودھ بیچے تو اسے فی بالٹی 3 لیٹر نقصان ہوتا  ہے ،  اب سوال یہ ہے کہ آیا اس دکان والے کے لیے دودھ کلو کے  حساب سے بیچنا جائز ہے؟  جس کی صورت یہ ہوگی کہ لیٹر کا پیمانہ چھوٹا کرکے کلو بھر کرنا پڑے گا، اگر مذکورہ صورت ناجائز ہے توبرائے کرم کوئی متبادل صورت ارشاد فرمائیں!

جواب

صورتِ  مسئولہ  میں دکان دار کے لیے  اس بات کی اجازت ہے کہ وہ دودھ لیٹر کے بجائے کلو کے حساب سے فروخت کرے، لیکن اس صورت میں ضروری ہو گا کہ گاہک کو اس بات کا علم ہو کہ اس دُکان پر دودھ لیٹر کے حساب سے نہیں، بلکہ کلو کے حساب سے فروخت کیا جاتا ہے، ورنہ دھوکا دینا لازم آئے گا اور دھوکا دہی سخت گناہ کا کام ہے۔

حدیث شریف میں ہے:

"عن أبي هریرة رضي اللّٰه عنه أن رسول اللّٰه صلی اللّٰه علیه وسلم قال: من غش فلیس منا".

(سنن الترمذي، باب ما جاء في کراهیة الغش في البیوع، ۱؍۲۴۵)

فقط واللہ اعلم