سوال

ہماری الماری میں دیمک لگ گئی ہے، اس میں سپارے بھی رکھے تھے تو ان کو بھی نقصان پہنچا ہے،تو اب وہ پڑھےنہیں جاسکتے ہیں، ان کا ہدیہ کیا ہوگا؟بہت زیادہ شہید ہوگئے ہیں ۔

جواب

قرآنِ مجید کےوہ  اَوراق یا سپارے جو کسی بھی وجہ (مثلًا دیمک لگ جانے کی وجہ ) سے بوسیدہ ہوگئے ہوں اور  تلاوت کرنے کے قابل نہ رہے ہوں  انہیں پاک کپڑے میں لپیٹ کر کسی محفوظ جگہ میں جہاں لوگوں کی آمد و رفت بالکل نہ ہو یا کم ہو، دفن کردیا جائے جیسا کہ مسلمان میت کو دفن کیا جاتا ہے، موجودہ زمانے میں چوں کہ قرآنِ مجید کے اَوراق پرنٹڈ ہوتے ہیں، پانی میں بہانے کے باوجود لکھائی نہیں مٹتی؛  اس لیے پانی میں بہانے سے گریز کیا جائے، اگر دفنانے کی کوئی صورت نہ ہو اور پانی میں بہانا ہو تو اس کی بہتر صورت جو کہ فتاوی رحیمیہ(۳/ ۱۳، ط:دارالاشاعت کراچی)میں لکھی ہے یہ ہے کہ قرآنی بوسیدہ اوراق کے ساتھ کوئی وزنی شے باندھ دی جائے اور اسے بہتے ہوئے گہرے پانی میں یا کنویں کی تہہ میں احترام کے ساتھ پہنچادیا جائے، خلاصہ یہ ہے کہ قرآنی بوسیدہ اوراق کو دفن کرنا پانی میں بہانے سے بہتر ہے۔

حاشية رد المحتار على الدر المختار - (6 / 422):

"وفي الذخيرة: المصحف إذا صار خلقاً وتعذر القراءة منه لايحرق بالنار، إليه أشار محمد، وبه نأخذ، ولايكره دفنه، وينبغي أن يلف بخرقة طاهرة ويلحد له؛ لأنه لو شق ودفن يحتاج إلى إهالة التراب عليه، وفي ذلك نوع تحقير إلا إذا جعل فوقه سقف، وإن شاء غسله بالماء أو وضعه في موضع طاهر لاتصل إليه يد محدث ولا غبار ولا قذر تعظيماً لكلام الله عز وجل اهـ".

فقط واللہ اعلم