سوال

اگر وضو کے بعد مسواک کی اور خون نکل آیا، نماز پڑھ لی تو اس نماز کا حکم کیا ہوگا؟ وضو کے بعد مسواک کا حکم کیا ہے؟

جواب

مسواک کا وقت کلی کا وقت ہے، یعنی نیت کر لینے  کے بعد  جب ہاتھ  دھو لے، اس کے بعد کلی کے ساتھ مسواک کر لے، یہ ہی اس کا صحیح وقت ہے۔

بہرحال! اگر کسی شخص نے وضو کے بعد مسواک کر لی اور خون نکل آیا جو کہ تھوک پر غالب بھی تھا  تو اس کا وضو ٹوٹ گیا اور  جو نماز اس حالت میں پڑھ لی  وہ ادا نہیں ہوئی، اس نماز کا اعادہ لازم ہو گا۔

اگر مسواک کرنے، انگلی  ملنے یا کلی کرنے سے خون جاری ہوتا ہو اور کچھ دیر نکلنے کے بعد بند ہوتا ہو تو نماز کے اوقات سے کافی پہلے یا بعد میں مسواک وغیرہ کی ایسی ترتیب بنائیں کہ مسواک کی سنت اور دانتوں کی صفائی بھی ہوجائے اور نماز سے پہلے وضو کرتے وقت مسواک وغیرہ ترک کردیں۔ 

الفتاوى الهندية (1/ 7):

"ثم وقت الاستياك هو وقت المضمضة، كذا في النهاية."

فقط واللہ اعلم