میں چکی کا کاروبار کرتا ہوں، جس میں مصالحہ وغیرہ پیستا ہوں اور اپنا مال بھی بیچتا ہوں، مسئلہ یہ ہے کہ میرے پاس لوگ مال لے کر آتے ہیں کہ میری مرچی میں "چوکر " ملا دو، جس کے الگ سے پیسے دیتے ہیں، اور میرا کام پسائی کا ہوتا ہے، اور میں وہ مال "چوکر" خود لا کردیتا ہوں اور اس چوکر میں بھی منافع کماتا ہوں جس میں رنگ تیل بھی ہوتا ہے، اور ان رنگ اور تیل میں بھی منافع کماتا ہوں۔اس میں میرے لیے کیا حکم ہے؟ کیا یہ میرے لیے جائز ہے یا نہیں ؟
صورتِ مسئولہ میں آپ کا چوکر، رنگ اور تیل منافع کے ساتھ فروخت کرنا، اور ان سب کو خریدار کی مرچی وغیرہ کے ساتھ پیسنے کی اجرت لینا جائز ہے؛ اس لیے کہ یہ دو مختلف چیزوں میں دو الگ الگ معاملے ہیں، جو چیز آپ فروخت کررہے ہیں اس کا منافع لے رہے رہیں اور پھر اس خریدار کی جو چیز چکی میں پیس کر دے رہے ہیں، اس کی الگ سے اجرت وصول کررہے ہیں ، اس لیے یہ صورت جائز ہے۔
البتہ اگر مذکورہ مرچی میں چوکر ملانے والے کا مقصد دھوکا یا ملاوٹ کرنا ہو ، اور آپ کو کسی شخص کے بارے میں معلوم ہو کہ یہ ملاوٹ کرکے دھوکا دہی کرے گا تو آپ کا ایسے شخص کے لیے مذکورہ مصالحہ پیسنا مکروہ ہوگا۔
چکی میں اشیاء پیسنے اور اس کی اجرت سے متعلق تفصیل کے لیے درج ذیل لنک پر فتویٰ ملاحظہ فرمائیں:
گندم پیسنے کی چکی لگانے کے کاروبار کا حکم
فقط واللہ اعلم
فتوی نمبر : 144207200870
دارالافتاء : جامعہ علوم اسلامیہ علامہ محمد یوسف بنوری ٹاؤن