سوال

میری بہن کاانتقال ہوگیا ہے ،اُن کے پیسے میرے پاس  موجود ہیں ،جو انہوں نے اپنے شوہر سے چھپ کر جمع کیے تھے گھر بنانے کے لیے،اُن کی کوئی  اولاد نہیں ہے،اور انتقال سے دو دن پہلے اُنہوں نے اپنے شوہر کو منع بھی کردیا تھا کہ اُن کے پاس کچھ نہیں ہے،کیوں کہ اُن کے شوہر بہت غلط حرکتوں میں لگے ہوئے تھے ،عورتوں کے ساتھ غلط تعلق تھے اُن کے ،شریعت کیا کہتی ہے مجھے بتائیں ؟ جو اُ ن کے پیسے اور زیور میرےپاس ہیں اُ س کا کیا کروں ؟

جواب

صورتِ مسئولہ میں  سائلہ کی بہن نے جو پیسے اور زیورات سائلہ کے پاس بطورِ امانت کے رکھوائے تھے ، اس پر چونکہ سائلہ کی بہن کی ملکیت تھی ،اس لیے اُس کے انتقال کے بعد وہ پیسے اور زیورات سائلہ کی بہن کا ترکہ شمار ہوگا،اور وہ  اُس کے شوہر سمیت تمام ورثاء میں اُن کے مقررہ حصوں کے بقدر تقسیم ہوگا اور شوہر کا آدھا حصہ ہے ،باقی ورثاء کی تفصیل لکھ کر تمام ورثاء کے حصص اور وراثت کی تقسیم دوبارہ دریافت کرلیں۔ 

قرآن کریم میں ہے :

"وَلَكُمْ نِصْفُ مَا تَرَكَ اَزْوَاجُكُمْ اِنْ لَّمْ يَكُنْ لَّھُنَّ وَلَدٌ"(النساء:12)

ترجمہ:"جو مال تمہاری عورتیں چھوڑ مریں اس میں تمہارا آدھا حصہ ہے بشرطیکہ ان کی اولاد نہ ہو"۔

فتاوی ہندیہ میں ہے:

"ويستحق الإرث بإحدى خصال ثلاث: بالنسب وهو القرابة، والسبب وهو الزوجية، والولاء ."

(الباب الثانى فى ذوى الفروض، ج:6، ص:447، ط:مكتبة رشيدية)

فقط واللہ اعلم