سوال

اگر بارہ یا تیرہ سال کا بچہ بیمار ہو اور ڈاکٹر کہیں کہ اس کو ماں کا دودھ پلانا ہےتو کیا ماں  کا دودھ بیٹا پی سکتاہے ؟

جواب

واضح رہے کہ شیرخوار بچہ خواہ لڑکا ہو یا لڑکی، دونوں کی مدت رضاعت دو سال ہے، یعنی چوبیس مہینے  تک دودھ پلاسکتے ہیں، اس کے بعد  دودھ پلانا منع  ہے، تاہم  اگر کوئی ماہر دین دار ڈاکٹر  بڑی عمر والے بچے/ بچی کے لیے  بھی  کسی بیماری کے سبب ماں کا دودھ تجویز کرے اور واقعۃً  اس کے علاوہ اس بیماری کا علاج کسی اور ذریعہ سے ممکن نہ ہو تو ایسی صورت میں اسے اپنی والدہ کا  دودھ نکال کر  پلانا جائز ہے۔

الدر مع الرد میں ہے:

"فرع اختلف في التداوي بالمحرم. وظاهر المذهب المنع كما في ‌إرضاع ‌البحر، لكن نقل المصنف ثمة وهنا عن الحاوي: وقيل يرخص إذا علم فيه الشفاء ولم يعلم دواء آخر كما خص الخمر للعطشان وعليه الفتوى. اهـ. ح."

(کتاب النکاح، باب الرضاع،3،ص211،ط: سعید)

فتاویٰ دار العلوم دیوبند میں اسی نوع کے ایک سوال کے جواب میں کہا گیا ہے کہ:

"مدتِ رضاعت کے بعد تداوی کے لیے عورت کے  دودھ کا  استعمال اس وقت جائز  ہے  جب اس میں شفا بقولِ طبیبِ حاذق مسلمان ثابت ہو اور کوئی دوسری دوا اس کے قائم مقام نہ ہو۔"

(کتاب النکاح،ج8،ص319،ط:دار الاشاعت)

فقط واللہ اعلم