سوال

اگر کوئی بلا ضرورت  زکات   میں   حیلہ تملیک کرے، اور طریقہ کار بھی صحیح نہ ہو  کہ ایک طالبہ کو یہ کہہ کر رقم دی اور کہا   کہ تملیک کرکے دے دو، اور  اس   نے رقم لے کر دوبارہ   ایسے ہی دے دی، اور اس رقم میں کوئی تصرف بھی نہیں کیا، اور اگر اسے کہا کہ تم کچھ رقم خود لے لو ایک دو دن بعد دے دینا تو اس خوف  سے   کہ باجی خفا ہوں گی   اس نے ہر بار   پوری رقم واپس کر دی یہ کہہ کر کہ میں نے تملیک کر دی ہے۔

۱۔   تو کیا اس سے اس شخص کی زکات  ادا ہوجائے گی  ؟   جس نے   زکات  کی  رقم دی  ہے   یا نہیں  ؟ 

۲۔ اور کیا دین کا ہر طالب علم مستحق زکات   ہے      خواہ وہ صاحب جائیداد ہو    ؟

جواب

واضح  رہے  کہ  کسی  شدید  ضرورت  اور  مجبوری  کے  بغیر  زکات  کی  رقم  میں  حیلہ  تملیک  کرنا  مستحقین  زکات  کی  حق  تلفی  کی  وجہ  سے  مکروہ  تحریمی    ہے،نیز  اگرکوئی    شدید  ضرورت  اور  مجبوری    پیش  آئے  تو  اس  کی  شرائط  کا  لحاظ  رکھتے  ہوئے  اس  کو     اختیارکرنے  کی  گنجائش  ہے،    اور   اس کا طریقہ یہ ہے کہ زکاۃ کی رقم کسی غریب کو   جو  مستحق  زکات  ہو    ،اس  کو    مالک  و  مختار   بنا کر دے دیں، اور اسے بتادیں کہ فلاں مصرف میں ضرورت ہے،  وہ  چاہے  تو  اس  مصرف  کے  لیے  دے  دے  اور  چاہے  تو  خود  استعمال  کرے، اس کے بعد اگر وہ اپنی خوشی سے   یہ  رقم بغیر  کسی  شرط  و  جبرکے   دے  دے       تو اس   طرح  تملیک  ہوجائے  گی،   اور  جس  شخص  نے  یہ  رقم  دی  تھی  اس  کی  زکات  ادا  ہوجائے  گی۔

۱۔صورت  مسئولہ  میں سائلہ  کے  بیان  کے  مطابق    باجی  نے  طالبہ  کو  تملیک    کرنے  کے  واسطے  رقم  دی  تھی،    اور  طالبہ  اس  بات  کو  جانتی  بھی  تھی،    اور  اس  نے    تملیک  ہی  کی  نیت  سے  رقم  پر  قبضہ  کر  کے   واپس  دے  دی،    تو  اس  طرح  تملیک  کرنے  سے  تملیک  ہوگئی  تھی  ،  اور  جس  شخص  نےمذکورہ    رقم  دی  تھی    اس  کی  زکات  ادا  ہوگئی  ہے،  لیکن  بلا  ضرورت  اور  مجبوری  کے  حیلہ  تملیک  کرنا  مکروہ  ہے  ،تاہم  شدید  ضرورت  و  مجبوری  کے  وقت  دِین  کی  بقا    کی  خاطر    ما  قبل  میں  بیان  کردہ  طریقہ  کے  مطابق  اختیار  کرنے  کی  گنجائش  ہے۔

۲۔  زکات  کا  مستحق  علی  الاطلاق  ہر  طالب  علم  یا  طالبہ    نہیں  ہے،    بلکہ   زکات     کا مصرف وہ مسلمان ہے جس مسلمان کے پاس اس کی بنیادی ضرورت  و استعمال ( یعنی رہنے کا مکان ، گھریلوبرتن ، کپڑے وغیرہ)سے زائد،  نصاب   چاندی  کے بقدر  (یعنی    ساڑھے باون تولہ چاندی یا اس کی موجودہ قیمت  کے برابر) مال یا  حوائج  اصلیہ  سے  زائد   سامان موجود نہ ہو  اور وہ سید/ ہاشمی   نہ ہو، ایسا آدمی زکوۃ کا مستحق ہے ،اور ایسے شخص کو مالک بنا کر زکوۃ دینا ضروری ہے۔

فتاویٰ شامی میں ہے:

"وحيلة التكفين بها التصدق على فقير ثم هو يكفن فيكون الثواب لهما وكذا في تعمير المسجد...وأخرج السيوطي في الجامع الصغير لو مرت الصدقة على يدي مائة لكان لهم من الأجر مثل أجر المبتدئ من غير أن ينقص من أجره شيء."

(ص:271،ج:2،کتاب الزکوۃ،ط:سعید)

وفیہ ایضاً:

"وإذا فعله حيلة لدفع الوجوب... قال أبو يوسف لا يكره؛ لأنه امتناع عن الوجوب لا إبطال حق الغير...وقال محمد: يكره، واختاره الشيخ حميد الدين الضرير؛ لأن فيه إضرارا بالفقراء وإبطال حقهم مآلا."

(ص:284،ج:2،کتاب الزکوۃ،باب زکوۃ الغنم،ط:سعید)

فتاویٰ عالمگیری میں ہے:

"إذا أراد أن يكفن ميتا عن زكاة ماله لا يجوز والحيلة فيه أن يتصدق بها على فقير من أهل الميت ، ثم هو يكفن به الميت فيكون له ثواب الصدقة ولأهل الميت ثواب التكفين، وكذلك في جميع أبواب البر التي لا يقع بها التمليك كعمارة المساجد وبناء القناطر والرباطات لا يجوز صرف الزكاة إلى هذه الوجوه."

(ص:392،ج:6،کتاب الحیل،الفصل الثالث في مسائل الزكاة،ط:دار الفکر)

وفیہ ایضاً:

"كره بعض أصحابنا  رحمهم الله تعالى  الحيلة في إسقاط الزكاة...ومشايخنا رحمهم الله تعالى أخذوا بقول محمد  رحمه الله تعالى  دفعا للضرر عن الفقراء."

(ص:391،ج:6،کتاب الحیل،الفصل الثالث في مسائل الزكاة،ط:دار الفکر)

فقط  واللہ  اعلم