سوال

اگر والد  نے بچی کے  لیے جہیز کی چیزیں بنائیں تو وہ چیزیں بچی کی ملکیت سمجھی جائیں  گی یا والد کی ملکیت ؟ اگر والد کہتاہے کہ میں نے وہ چیزیں بچی کی ملکیت میں دے دی ہیں تو اس کے صرف اتنا کہنے سے وہ چیزیں بچی کی ملیکت میں چلی جائیں گی یا باپ کی ملکیت میں ہی رہیں گی ؟

جواب

 نابالغ بچے یا بچی کو ہبہ کرنے کی نیت سے والد جو کچھ خریدتے ہیں، خریدنے کے  ساتھ  ہی بچہ / بچی کی ملکیت ثابت ہوجاتی ہے، البتہ بالغ اولاد کے  لیے جو کچھ خریدا جاتا ہے، اس پر اس کی ملکیت اس وقت تک ثابت نہیں ہوتی جب تک کہ وہ اس پر قبضہ نہ کرلے، پس صورتِ  مسئولہ میں بالغہ بیٹی کے جہیز کے  لیے والد نے جو کچھ بھی خریدا ہو  جب تک والد وہ اشیاء بیٹی کے قبضہ و اختیار میں نہیں دے گا اس وقت تک اس پر  شرعًا والد کی ہی ملکیت رہےگی اگرچہ زبانی  طور پر والد کہہ  دے  کہ  یہ میں نے بیٹی کو دے دی ہے۔

 مجلة الأحكام العدلية میں ہے:

" (المادة 850) إذا وهب أحد لابنه الكبير العاقل البالغ شيئا يلزم التسليم والقبض.

(المادة 851) يملك الصغير المال الذي وهبه إياه وصيه أو مربيه يعني من هو في حجره وتربيته سواء أكان المال في يده أم كان وديعة عند غيره بمجرد الإيجاب أي بمجرد قول الواهب: وهبت , ولا يحتاج إلى القبض".

( الباب الأول: بيان المسائل المتعلقة بعقد الهبة، الفصل الأول: في بيان المسائل المتعلقة بركن الهبة وقبضها، ١ / ١٦٤، ط: نور محمد)

فقط واللہ اعلم