سوال

teins  اور  b4u جو کمپنی ہے اس کے بارے میں آپ جانتے ہیں، اس کے بارے میں شریعت  کا کیا حکم ہے، کیا یہ جائز ہے  یا نہیں؟

جواب

B4U کمپنی کا حکم

کمپنی کی ویب سائٹ سے حاصل شدہ معلومات اور دیگر ذرائع سے دست یاب معلومات کے مطابق اس کا حکم درج ذیل ہے:

1- چوں کہ مذکورہ ادارہ کرپٹو کرنسی میں کاروبار کرتا ہے، اور مذکورہ کرنسی پاکستان و دنیا کے بیشتر ممالک میں تاحال غیر تسلیم شدہ ہے، لہذا اس میں سرمایہ کاری کرنے سے اجتناب کیا جائے۔

2- مذکورہ کمپنی میں سرمایہ کاری کرنے پر کمپنی دوقسم کے پیکج دیتی ہے:

1: فکس منافع میں آپ کا منافع فکس ہوگا۔ 2: آپ کامنافع فکس نہیں رہتا، کم بھی اور زیادہ بھی ہوسکتا ہے۔

 پہلی صورت جس میں منافع متعین ہوتا ہے،  وہ بہر صورت جائز نہیں۔

 اور دوسری صورت کے بارے میں حکم یہ ہے کہ کرپٹو کرنسی کو چوں کہ پاکستان میں قانونی حیثیت حاصل نہیں ہے، تاحال اس کرنسی کا معاملہ ہی  مشکوک ہے، اور ابھی تک علماء نے اس کی خرید و فروخت کی اجازت نہیں دی ہے، پس جب تک مذکورہ کمپنی کے تمام پہلو مکمل واضح نہ ہو جائیں، اس وقت تک  دوسری قسم (یعنی جس میں منافع متعین نہیں ہوتا) میں بھی انویسٹمنٹ کرنے سے   اجتناب کیا جائے،  کیوں کہ صرف منافع فکس نہ ہونے سے منافع حلال نہیں ہوتا، بلکہ دیگر شرعی حدود و شرائط کا لحاظ رکھنا بھی ضروری ہے؛ لہذا اس کمپنی میں پیسے انویسٹ کرنا جائز نہیں ہے۔

3- اگر انویسٹر کے توسط سے  لگنے والوں کے بعد ان کے توسط سے کاروبار میں لگنے والوں کی وجہ سے بھی پہلے انویسٹروں  کو چین در چین  اجرت یا کسی عنوان سے رقم دی جاتی ہے تو ناجائز ہونے کی ایک اور وجہ ہوگی۔

Teins  کمپنی کا حکم

اسی طرح  ٹائنس کمپنی بھی دیگر  ملٹی لیول مارکٹنگ کمپنیوں کی طرح  جس طریق کار کے مطابق کاروبار  کرتی ہے، اور منافع دیتی ہے، وہ درست نہیں ہے۔

مزید تفصیل کے لیے درج ذیل لنک ملاحظہ کیجیے:

ٹائنز کمپنی میں کام کرنا

فتاوی شامی میں ہے:

"(وكون الربح بينهما شائعًا) فلو عين قدرًا فسدت."

(كتاب المضاربة، ج:5، ص:648، ط:ايج ايم سعيد)

مرقاة المفاتيح شرح مشكاة المصابيح میں ہے:

وعن النعمان بن بشير - رضي الله عنهما - قال: قال رسول الله صلى الله عليه وسلم: " «الحلال بين والحرام بين، وبينهما مشتبهات لا يعلمهن كثير من الناس، فمن اتقى الشبهات استبرأ لدينه وعرضه، ومن وقع في الحرام كالراعي يرعى حول الحمى يوشك أن يرتع فيه، ألا وإن لكل ملك حمى، ألا وإن حمى الله محارمه، ألا وإن في الجسد مضغة إذا صلحت صلح الجسد كله، وإذا فسدت فسد الجسد كله، ألا وهي القلب» ". متفق عليه.

(باب الكسب وطلب الحلال، ج:5، ص:1891، ط:دار الفكر.بيروت)

فقط واللہ اعلم