سوال

اذان کے آخر میں "لا إلٰه إلّا اللّٰه" پر مؤذن رک جاتے ہیں،  جو مقتدی اذان سنے وہ  "لا إلٰه إلّا اللّٰه"  کے جواب میں "لا إلٰه إلّا اللّٰه محمّد رسولاللّٰه" پورا پڑھے گا یا صرف "لا إلٰه إلّا اللّٰه" پڑھےگا؟

جواب

ازروئے شرع اذان کا جواب دینا زبان سے سنت (مستحب) ہے، اور اس کا طریقہ یہ ہے کہ جو کلمات مؤذن کہتاہے جواب دینے والا وہی کلمات دہرائے، البتہ ’’حيّ على الصلاة‘‘  اور ’’حيّ على الفلاح‘‘ کے وقت ’’لاحول ولاقوة إلا باللّٰه‘‘  کہے۔ نیز اگر دونوں کلمات (’’حيّ على الصلاة‘‘ ،’’حيّ على الفلاح‘‘ اور  ’’لاحول ولاقوة إلا باللّٰه‘‘) کہے تب بھی درست ہے۔اور فجر کی اذان میں ’’الصلاة خیر من النوم‘‘ کے جواب میں ’’صدقت و بررت‘‘ کہے۔

بصورتِ مسئولہ کلماتِ اذان کے اخیر میں  "لا إلٰه إلّا اللّٰه" کے جواب میں یہی کلمات دہرانا ہے، ان کلمات پر اضافہ کرنا یعنی مزید "محمدرسول اللّٰه" پڑھنا درست نہیں ہے۔