میرابیٹاعرصہ چار سال دو مہینے سے لاپتہ ہے،اس کی بیوی اور بچیاں میری کفالت میں ہیں اور میں ان کا واحد کفیل اور سربراہ ہوں۔میرابیٹااپنے دوست  کے ساتھ برابرکی شراکت داری پر اسکول چلاتا تھا، کچھ عرصہ قبل اس کے شراکت دار نے مجھ سے اس بات کی اجازت لی کہ میں اپنی بہو کو  ہفتہ میں صرف تین دن اسکول کی  تربیہ کلاس لینے کی اجازت دے دوں ،میں نے اسے اجازت دے دی ۔اس کے بعد کرونا کی وجہ سے اسکول بند ہوئے ،لیکن میری بہو اسکول جاتی رہی،اسی اثنا میں وہاں کی پرنسپل کی شادی ہوگئی ،اور انہوں نے اسکول کو خیر باد کہہ دیا۔میرے بیٹے کے شراکت دار نے مجھ سے اجازت لیے بغیر میری بہو کو پرنسپل بنادیا۔اب اس کے پاس میری بہو کا موبائل نمبر بھی ہے اور وہ اس سے گاہے بگاہے گفتگوبھی کرتاہے ،اسکول کے اندر مختلف میٹنگز میں تمام اساتذہ کے ساتھ اور کبھی اکیلے میں بھی گفتگو کاسلسلہ جاری رہتاہے ۔میں نے اس پر اعتراض کیا اوراپنے بیٹے کے شراکت دار سے کہا کہ آپ میری بہو کو سکول سے فارغ کردیں، اس نے صاف انکار کردیا اور کہا کہ بہو کو سسر کی اجازت کی ضرورت ہی نہیں ہے ،اس سلسلے میں اس نے میری بہو کو بھی ورغلایا ہے ،اس کی کیا نیت ہے یہ تو بہر حال اللہ بہتر جانتاہے ۔  میں نے اپنی بہو سے اسکول چھوڑنے کے لیے کہا تو اس نے بھی صاف انکار کردیا اور میرے ساتھ بدتمیزی سے پیش آئی۔

یہاں میں عرض کرتا چلوں کہ یہ اسکول دنیاوی اور اخروی تعلیم دیتاہے اوراس میں مخلوط تعلیم نہیں دی جاتی ۔ہرماہ جتنی تنخواہ میرے بیٹے کاشراکت دار لیتاہے،اتنی ہی ہر مہینے ہمیں بھی ملتی ہے ۔اور اس میں سے مبلغ بیس ہزار(20000 )روپے میں اپنی بہو کو دیتاہوں ،اس کو اسکول سے کوئی تنخواہ نہیں ملتی۔اب پوچھنایہ ہے کہ :

میری بہو کو باہر جانے کے لیے( خواہ اسکول کے لیے ہی کیوں نہ ہو) میری اجازت کی ضرورت ہے یا نہیں ؟

واضح رہے کہ ہمارا گھرانہ شرعی پردہ کرتاہے ،نیزمیں اپنی بہو اور اس کے بچوں کا واحدسربراہ اور  کفیل ہوں اور میں اس کے اسکول میں پڑھانے پر  بہت سے تحفظا ت رکھتاہوں۔

وضاحت: میری بہو کےبالغ بھائی ہیں، البتہ ان کے والد انتقال کرچکے ہیں۔