اعتکاف کے دوران حیض اگر جاری ہو جائے تو کیا اعتکاف ختم ہو جائےگا؟
اگر اعتکاف میں بیٹھی خاتون کو ماہواری آجائے تو اس کا اعتکاف باطل ہو جائے گا، لہذا ایسی حالت میں عورت اعتکاف چھوڑدے، پاک ہونے کے بعد ایک دن کے اعتکاف کی قضا کرنا ضروری ہوگا، پس اگر رمضان میں ہی پاک ہوگئی تو رمضان میں ہی قضا کرلے، اور اگر رمضان کے بعد قضا کرے تو اس دن کا روزہ رکھنا لازم ہوگا۔
اعتکاف کی قضا کا طریقہ یہ ہے کہ سال کے جن دنوں میں روزے رکھنا منع ہیں، ان دنوں کے علاوہ کسی دن مغرب سے دوسرے دن کے غروب آفتاب تک ایک دن رات کا اعتکاف کرلیا جائے۔
بدائع الصنائع میں ہے:
"وَلَوْ حَاضَتْ الْمَرْأَةُ فِي حَالِ الِاعْتِكَافِ فَسَدَ اعْتِكَافِهَا؛ لِأَنَّ الْحَيْضَ يُنَافِي أَهْلِيَّةَ الِاعْتِكَافِ لِمُنَافَاتِهَا الصَّوْمَ، وَلِهَذَا مُنِعَتْ مِنْ انْعِقَادِ الِاعْتِكَافِ فَتُمْنَعُ مِنْ الْبَقَاءِ". ( كتاب الإعتكاف، فَصْلٌ رُكْنُ الِاعْتِكَافِ، ٢ / ١١٦، ط: دار الكتب العلمية) فقط والله أعلم
فتوی نمبر : 144109200613
دارالافتاء : جامعہ علوم اسلامیہ علامہ محمد یوسف بنوری ٹاؤن