سوال

انسان کے مرنے کے بعد دفناتے وقت اس کا دایاں کندھا خانہ  کعبہ کی طرف ہوتا ہے، لیکن عمرہ کرتے وقت اس کا بایاں کندھا  خانہ کعبہ کی طرف ہوتا ہے، ایسا فرق کیوں ہے؟

جواب

واضح رہے کہ شریعت کے احکامات اگرچہ حکمت سے خالی نہیں، لیکن وہ سماعی  ہیں، ان کو انسان کی ناقص عقل کی کسوٹی پر پرکھنا درست نہیں، بلکہ ان کی اصل علت اور سبب نبی کریم ﷺ کی اطاعت ہے، یعنی جس طرح نبی کریم ﷺ سے منقول ہے، اسی  طرح مسلمان اُن کو کرنے کے مکلف ہیں، بلاوجہ اس کی علتیں اور فرق تلاش کرنا درست نہیں۔ نیز مردے کو دفنانے کا سنت طریقہ یہ ہے کہ مردے کو قبر میں دیوار کے سہارے دائیں کروٹ پر لٹایا جائے اور رخ قبلہ کی طرف کیا جائے۔

لہٰذا صورتِ مسئولہ میں آپ کا یہ کہنا کہ "انسان کے مرنے کے بعد دفناتے وقت اس کا دایاں کندھا خانہ  کعبہ کی طرف ہوتا ہے"، درست نہیں؛ کیوں کہ سنت طریقے کے مطابق تدفین کرنے کی صورت میں مردے کا کندھا زمین کی طرف ہوتا ہے، قبلے کی طرف نہیں۔ اور اس میں حکمت یہ ہے کہ نبی کریم ﷺ نے ہر نیک کام میں تیامن (یعنی دائیں طرف سے کرنے) کو پسند فرمایا ہے، لہٰذا مردے کو بھی دائیں کروٹ پر لٹاکر قبلہ رُخ کیا جاتا ہے، ورنہ بائیں کروٹ پر لٹاکر بھی قبلہ رُخ کیا جاسکتا ہے، لیکن خلافِ سنت ہے۔

اسی طرح بیت اللہ کے طواف میں خانہ کعبہ کی طرف رُخ کرکے طواف کرنے میں چوں کہ حرج لازم آتا ہے، اس لیے طواف کی ابتداء اور انتہاء میں تو قبلہ رُخ ہونے کا حکم ہے، مگر طواف کے دوران نہیں، البتہ پھر چلتے ہوئے اب دو صورتیں تھیں، یا تو دائیں طرف سے شروع کیا جاتا یا بائیں طرف سے، تو طواف چوں کہ عبادت ہے اور نیک کام ہے، اور نیکی کے کاموں میں دائیں طرف سے شروع کرنا پسندیدہ ہے، لہٰذا ابتداء میں بیت اللہ کی طرف رخ کرنے کے بعد اُسی قاعدے کے بموجب کہ ہر نیک کام میں تیامن پسندیدہ ہے، طواف کو  دائیں طرف سے شروع کرنے کا حکم دیا گیا، نیز اس کی ایک اور حکمت فقہاء کرام یہ بھی ذکر فرماتے ہیں کہ طواف کرنے والا بیت اللہ کے ساتھ ایسا ہے جیسے امام کے ساتھ ایک تنہاء اقتداء کرنے والا، اور یہ بات معلوم ہے کہ جب امام کے ساتھ ایک مقتدی ہو، تو وہ امام کے دائیں طرف کھڑا ہوتا ہے اور امام اُس کےبائیں طرف ہوتا ہے، اسی طرح طواف کرنے والے کو بھی حکم ہوا کہ وہ بیت اللہ کے دائیں طرف رہے اور بیت اللہ کو اپنے بائیں طرف رکھے۔

بہرحال یہ دونوں اعمال (بیت اللہ کا طواف اور مردے کی تدفین) امرِ تعبدی کے قبیل سے ہیں، اور ان میں اصل علت نبی کریم ﷺ کی اطاعت ہے، نیز ان دونوں اعمال میں کوئی مناسبت یا تضاد بھی نہیں ہے کہ جس کی بناء پر ان کے درمیان کسی  فرق کا سوال کیا جائے۔

قرآن مجید میں اللہ رب العزت کا ارشاد ہے:

"وَأَقِيمُوا الصَّلَاةَ وَآتُوا الزَّكَاةَ وَأَطِيعُوا الرَّسُولَ لَعَلَّكُمْ تُرْحَمُونَ"

[النور: ٥٦]

صحیح مسلم میں ہے:

"حدثنا إسحاق بن إبراهيم وعلي بن خشرم. جميعا عن عيسى بن يونس. قال ابن خشرم: أخبرنا عيسى عن ابن جريج. أخبرني أبو الزبير؛ أنه سمع جابرا يقول: رأيت النبي صلى الله عليه وسلم يرمي على راحلته يوم النحر، ويقول: "لِتَأْخُذُوا ‌مَنَاسِكَكُمْ. فَإِنِّي لَا أَدْرِي لَعَلِّي لا أحج بعد حجتي هذه"."

(كتاب الحج، باب استحباب رمي جمرة العقبة يوم النحر راكبا. وبيان قوله صلى الله تعالى عليه وسلم "لتأخذوا ‌مناسككم"، ٢/ ٩٤٣، ط: دار إحياء التراث العربي)

فتاویٰ عالمگیریہ میں ہے:

"ويوضع في القبر على جنبه الأيمن مستقبل القبلة، كذا في الخلاصة."

(كتاب الصلاة، الباب الحادي والعشرون في الجنائز، الفصل السادس في القبر والدفن والنقل من مكان إلى آخر، ١/ ١٦٦، ط: دارالفكر)

فتاویٰ شامی میں ہے: