سوال

اگر امام رکوع سے اٹھتے ہوئے" سمع اللہ لمن حمدہ "نہ کہے اورسجدہ کے لیے  "اللہ اکبر "بھی نہ کہے تو کیا سجدہ سہوواجب ہوگا؟

جواب

صورتِ مسئولہ میں جب امام  غلطی سے رکوع سے سراٹھا تے وقت  "سمع اللّٰه لمن حمده"اور سجدہ میں جاتے ہوئے "اللّٰه أكبر"   کہنا بھول گیاتو  نماز ادا ہوجائے گی، اور  سجدۂ سہو بھی  لازم نہیں ہوگا ،کیوں کہ  سجدہ سہو کسی واجب کو چھوڑنے، یا رکن یا واجب کی ادائیگی میں تاخیر کی صورت میں واجب ہوتاہے،جب کہ یہ دونوں چیزیں سنت ہیں ،اور ترک سنت پر سجدہ سہونہیں آتا۔

فتاوی ہندیہ میں ہے:

"و لايجب السجود إلا بترك واجب أو تأخيره أو تأخير ركن أو تقديمه أو تكراره أو تغيير واجب بأن يجهر فيما يخافت وفي الحقيقة وجوبه بشيء واحد وهو ترك الواجب، كذا في الكافي."

(كتاب الصلوة ،الباب الثاني عشر،ج: 1، ص: 126، ط: رشيدية)

فقط واللہ اعلم