سوال

 آج کل تو پاکستان میں ایک تولہ سونا کی قیمت دو لاکھ بائیس ہزار (222000) روپے ہے ،  اور صرف ایک تولہ سونا کی قیمت ساڑھے باون تولے چاندی سے بھی زیادہ ہے تو پھر اس پر زکوٰۃ کیوں واجب نہیں ہے؟  اس کی کیا وجہ ہے ؟ تفصیل سے بتائیں ۔

جواب

شریعت میں سونا اور چاندی میں ہر ایک کا الگ الگ نصاب ہے ، صرف سونے کا نصاب ساڑھے سات تولہ سونا ہے  ، اگر کسی کی ملکیت میں  صرف سونا ہواور اسے کے علاوہ (چاندی ، نقد رقم ، اور مال تجارت ) میں سے کچھ بھی نہ ہو تو اس  پر زکات واجب نہیں ، چاندی  کانصاب ساڑھے باون تو لہ چاندی ہے ، لیکن اگر سونا چاندی ، سونا نقدی ، سونا مالِ تجارت یا سونا ، چاندی ، مالِ تجارت اور نقدی مخلوط ہو تو اس کا نصاب بھی ساڑھے باون تو لہ چاندی ہے  ۔

لہٰذا اگر کسی کے پاس صرف ایک تولہ سونا ہو اور ساتھ نقدی ، مالِ تجارت یا چاندی نہ ہو تو اس پر زکوۃ واجب نہیں ، کیوں کہ اس کے لیے معیا ر سونے کا نصاب ہے ، چاندی کا نہیں۔

فتاوی ہندیہ میں ہے:

"تجب في كل مائتي درهم خمسة دراهم، وفي كل عشرين مثقال ذهب نصف مثقال."

(كتاب الزكاة ، الباب الثالث في زكاة الذهب والفضة ولعروض ، الفصل الأول في زكاة الذهب والفضة ج: 1 ص: 178 ط: دار الفکر)

وفیہ  ایضا :

"وتضم قيمة العروض إلى الثمنين والذهب إلى الفضة قيمة كذا في الكنز...لكن يجب أن يكون التقويم بما هو ‌أنفع ‌للفقراء قدرا ورواجا."

(كتاب الزكاة ، الباب  الثالث في زكاة الذهب والفضة ولعروض ، الفصل الأول في زكاة الذهب والفضة ج: 1 ص: 179 ط: دارالفکر)

  فقط واللہ اعلم