سوال

اگر کسی لڑکے اور لڑکی کا رشتہ کیا ہوا تھا، پھر وہ آپس میں بات کرتے ہوں اور لڑکے نے لڑکی سے کہا: میں آپ کو بیوی بنالوں، اس نے کہا: ہاں! کیوں نہیں! پھر اس لڑکے نے دو گواہوں کی موجودگی میں اس لڑکی کا اپنے ساتھ نکاح کر لیا، مگر وہ لڑکی اس مجلس میں موجود نہیں تھی تو کیا وہ نکاح ہو گیا؟

جواب

صورتِ مسئولہ میں لڑکے کا لڑکی سے یہ پوچھنا کہ"میں آ پ کو بیوی بنالوں؟" اورجواب میں لڑکی کا یہ کہنا"ہاں! کیوں نہیں"، اس سے لڑکے کو اس بات کی وکالت مل گئی تھی کہ وہ اس لڑکی کا نکاح اپنے سے کرالے، لڑکے نے دو گواہوں کی موجودگی میں اس لڑکی کا نکاح اپنے ساتھ کرلیا تو یہ نکاح منعقد ہوگیا (بشرطیکہ ایجاب وقبول کے الفاظ درست ادا کیے ہوں)، تاہم چوں کہ یہ بات خاندان والوں کے علم میں نہیں ہے؛ اس لیے یا تو اسے خاندان والوں کے علم میں لایا جائے یا جب تک خاندان والوں کی طرف سے باقاعدہ نکاح ورخصتی نہیں ہوجاتی آپس کے میل ملاقات سے اجتناب کریں، اس میں عافیت اور عزت کی حفاظت ہے۔ فقط واللہ اعلم