سوال

میرے پاس دو مہینے سے نقد 15 لاکھ روپے بینک میں موجود ہے، اس پر زکوۃ   واجب ہے   کہ نہیں؟

جواب

اگر آپ پہلے سے صاحبِ نصاب ہیں تو دیگر قابل زکوٰۃ اموال کا سال پورا ہونے پر ان کی زکوٰۃ کے ساتھ  ان پندرہ لاکھ روپے کی زکوٰۃ نکالنا بھی آپ پر لازم ہوگا، (بشرطیکہ سال پورا ہونے سے پہلے یہ رقم خرچ نہ ہوئی ہو، ورنہ جتنی رقم بچ گئی وہ دیگر قابلِ نصاب اموال کے ساتھ ملا کر زکاۃ ادا کرنا ہوگی)  اگرچہ ان پر مستقل سال نہ گزرا ہو۔

اور اگر آپ پہلے سے صاحبِ نصاب نہیں ہیں، بلکہ ان پندرہ لاکھ روپوں کے ملکیت میں آنے کے بعد نصاب کے مالک بنیں ہیں تو  جب اس رقم پر قمری سال مکمل ہوجائے اس وقت اس کی زکوٰۃ ادا کرنا لازم ہوگا۔فقط واللہ اعلم