سوال

 مجھےبیوی اور سسر نےباربار جھوٹا بولا جس  کی وجہ سے میں جذباتی ہو گیا اور غصہ اتنا کیا کہ آنکھوں کے آگے اندھیرا ہو گیا ،مجبور ہو کر جب کوئی بات نہیں مان رہے تھے تو ایک کی نیت کر کے تین کی گنتی کر کے تینوں(سسر،چچااورچچی) کو اشارہ کر کے" طلاق ہے ،طلاق ہے،طلاق ہے "کہا،بیوی موجود تھی،  تینوں کوہاتھ سے الگ الگ اشارہ کیا تھااور زبان سے کہا تھا، گواہوں میں سے ایک فریق کہتا ہے کہ میں نے تینوں سے بعد میں پوچھا بھی تھا کہ تینوں نے  سن لیا؟ لیکن یہ گواہ والی بات مجھے یاد نہیں ہے ،بیوی کو میں نے پہلے سے کہا ہوا تھا کہ اگر کسی وجہ سے حالات بگڑ گئے تو جب تک میں تمہاری طرف  متوجہ نہ ہوں وہ حکم تمہارے لیے نہ ہو گا، مجھے صحیح تفصیل سے آگاہ کیا جائےکہ طلاق ایک ہوئی ہے یانہیں ہوئی؟ نیز میں نے جامعہ عمر بن خطاب سے فتوی طلب کیا تو انہوں نے ایک کا فتوی دیا، لیکن میرا سسر نہیں مان رہا  ، بیوی سے بات ہوئی اور رجوع ہوا تو اس نے بتایا کہ اس کو کہا تھا کہ طلاق نہیں ہوئی تھی، باقی سچائی اللہ کو معلوم ہوگی بیوی کی سچائی کی گواہی مشکل ہے۔

 بچہ چار  سےآٹھ  دن میں پیدا ہو جائے گا ،بچے اور بیوی کے بارے میں  کیا احکامات ہوں گے، اس کی بھی راہ نمائی کر دیں ۔

وضاحت:

 میاں بیوی کی صرف تکرار تھی، بیوی اپنے ابو سے جھوٹ بول کر کہتی ہے کہ اس (شوہر)نے رات کو بولا  تھاکہ صبح اپنےگھر  سسرال جانا ہے ، اس بات پر تکرار تھی، شوہر بول رہا تھا کہ اس نے جھوٹ بولا ہے اور شوہر نے اس معاملے میں خود کو سچا ثابت کیا اورسسر اور دوگواہوں کے سامنے قسم بھی کھائی کہ میں سچا ہوں، جس پر سسر  نہ مانا ،دو گواہ مان گئے کہ شوہر سچا ہے۔

شوہر غصہ میں تھا، آنکھوں کے سامنے ایک بار اندھیرا چھا گیا، پھر شوہر نے دل میں نیت کی کہ اب طلاق دیتا ہو ں،پھر تین کی گنتی کی اور تینوں(سسر،چچااور چچی) کی طرف انگلی کا اشارہ کیا اور زبان سے بولا" میری اس کو طلاق ہے"،" اس کو "کہتے وقت اشارہ نیچے کیا، بیوی کی طرف نہ کیا، اور تینوں کو طلاق کہتے وقت نیت یہ تھی کہ تینوں سن لیں تاکہ بعد میں جھوٹا نہ کہا جائے ،نیت صرف ایک طلاق کی تھی ،بوجہ بار بار جھوٹا کہا جانا تین کو الگ الگ ایک بار کی نیت سے کہا، تاکہ تینوں سن لیں اور گواہ بن جائیں کہ شوہر نے  ایک طلاق  دی ہے۔

جواب

صورت ِ مسئولہ میں سائل کے الفاظ "طلاق ہے ،طلاق ہے،طلاق ہے"الفاظِ صریحہ میں سے ہیں ، اور الفاظِ صریحہ میں نیت معتبرنہیں ہوتی ،بلکہ نیت کے بغیربھی طلاق واقع ہوجاتی ہے، لہذا  سائل کا یہ کہنا کہ "ایک کی نیت کر کے تین کی گنتی کر کے تینوں(سسر،چچا اورچچی) کو اشارہ کر کے" طلاق ہے ،طلاق ہے،طلاق ہے "کہا "، اس کا شرعاً کوئی اعتبار نہیں ہے، بلکہ مذکورہ الفاظ سے  سائل کی بیوی  پرتین طلاقیں واقع ہوگئیں ، اور وہ سائل پرحرمت مغلّظہ کے ساتھ حرام ہوگئی ہے،  اب  دونوں کا ساتھ  رہنا شرعاً جائز نہیں ہے،مطلقہ اپنے  شوہر سے علیحدہ ہونے کے بعد اپنی عدّت ( حاملہ ہونے کی وجہ سے بچے کی پیدائش تک) گزار کر دوسری جگہ نکاح کرسکتی ہے۔البتہ اگر مطلقہ اپنی عدّت گزارنے کے بعد کسی دوسرے شخص سے نکاح کرے اور دوسرے شوہر سے صحبت(جسمانی تعلق ) ہوجائے اس کے بعد وہ دوسرا شوہر  اسےطلاق دےدے یا اس  کا انتقال ہوجائے  یا عورت اس سے طلاق لے لے،تو  اس کی عدّت گزار کر اپنے پہلے شوہر سے دوبارہ نکاح ہوسکتا ہے ،بچے کے متعلق شرعی حکم یہ ہے بیٹاسات سال تک اور بیٹی نوسال تک اپنی والدہ کی پرورش میں رہےگی،مذکورہ مدت گزرنے کے بعد ان بچوں کی پرورش کا حق والد کو ہوگا۔