سوال

اگر دو دفعہ طلاق دی ہو ، اور وہ رجوع کرنا چاہتا ہے،تو اس کا کیا طریقہ ہے؟

جواب

 صورت مسئولہ میں دی گئی دو طلاقیں اگر طلاق رجعی ہیں، تو عدت کے اندر اندر شوہر رجوع کرنا چاہے تو کر سکتا ہے، رجوع کرنے کا طریقہ یہ ہے کہ بیوی کو زبان سے یہ کہہ دے کہ میں تم سے رجوع کرتا ہوں اور اس پر دوگواہ بھی قائم کردےتوبہترہے، اگرشوہرعدت کےدوران   حقوق زوجیت  ادا کردے  تو اس سے بھی رجوع ہوجائے گا،البتہ اگر عدت گزر گئی ،اورشوہرنےنہ  زبانی طور پر اور نہ ہی عملی طور پر رجوع کیاتو نکاح ختم ہو جائے گا ، پھر باہمی رضامندی سے نیا مہر مقرر کرکے گواہوں کی موجودگی میں دوبارہ نکاح کرسکتے ہیں۔

اور اگر دو طلاقیں بائن دی ہوں، تو فورا نکاح ختم ہو جائے گا ،ایسی صورت میں باہمی رضامندی سے نیا مہر مقرر کرکے گواہوں کی موجودگی میں دورانِ عدت اور عدت کے بعد دوبارہ نکاح کیا جاسکتا ہے۔
واضح رہے کہ عدت میں  رجوع کرنے کی صورت میں یا نیا نکاح کرنے کے بعد  شوہر کو آئندہ صرف ایک طلاق دینے کا اختیار باقی ہوگا،یعنی اگر مزید ایک طلاق دے گا تو یہ ایک طلاق پہلی دو طلاقوں سے مل کر مجموعی طور پر تین طلاقیں واقع ہو جائیں گی اور عورت حرمت مغلظہ کے ساتھ حرام ہو جائے گی۔