سوال

ان شاءاللہ کس طرح لکھنا چاہیے؟ اگر اس طرح سے لکھے ’’انشاءاللہ‘‘  تو کیا مفہوم و معنی تبدیل ہوجاتے ہیں؟

جواب

ان شاء اللہ لکھنے کادرست طریقہ تو ’’ان شاء اللہ‘‘  ہی ہے، (یعنی تینوں الفاظ کو جدا جدا لکھنا)، اور ’’ انشاء اللہ‘‘  لکھنا اگر چہ عربی اِملا کے قواعد کے مطابق درست نہیں ہے، مگر جو لوگ ’’انشاء اللہ‘‘  لکھتے ہیں ان کے پیشِ نظر بھی اللہ کا پیدا کیا ہوا معنی نہیں ہوتا، اور قاعدہ ہے: "الخطأ المشهور أولی من الصواب المهجور". (فتاویٰ شامی)  یعنی ایک لفظ غلط ہے مگر عوام میں رواج پاچکا ہے تو وہ اس سے بہتر ہے جو درست ہے مگر لوگ اسے چھوڑ چکے ہیں؛ اس لیے ’’انشاء اللہ‘‘  (یعنی ’’ان‘‘  اور ’’شاء‘‘  کو ملاکر انشاء) لکھنے کی بھی اجازت ہے۔ تاہم مکمل تحریر عربی میں ہو اور اس میں ’’ان شاء اللہ‘‘  کا لفظ آجائے تو اسے عربی قواعد کے مطابق لکھنا چاہیے۔ فقط واللہ اعلم