ناخن کاٹنے کی ترتیب کی حیثیت!
کیا فرماتے ہیں مفتیان کرام اس مسئلہ کے بارے میں کہ: ناخن کاٹنے کا مشہور طریقہ جو بعض کتابوں میں لکھا ہے : ’’سیدھے ہاتھ کی شہادت کی انگلی سے شروع کرکے ترتیب وار چھنگلیاں سمیت تراشیں، مگر انگوٹھا چھوڑدیں، اب اُلٹے ہاتھ کی چھنگلیاں سے شروع کرکے ترتیب وار انگوٹھے سمیت ناخن تراش لیں، اب آخر میں سیدھے ہاتھ کا انگوٹھا جو باقی تھا، اس کا ناخن بھی کاٹ لیں، اس طرح سیدھے ہاتھ سے شروع ہوکر سیدھے ہاتھ پر ختم ہوگا۔‘‘ کیا یہ طریقہ مسنون ہے؟ الجواب حامداً ومصلیًا واضح رہے کہ ہاتھوں اور پیروں کے ناخن کاٹنے کی ترتیب اور طریقہ کے بارے میں کوئی بھی صحیح روایت موجود نہیں ہے، البتہ اتنی با ت ثابت ہے کہ حضور اکرم a دائیں طرف سے ابتداء کرنے کو پسند فرماتے تھے۔ بعض فقہاء مذکورہ ترتیب کے مطابق ناخن کاٹنے کو اولیٰ اور بہتر کہتے ہیں، چنانچہ مذکورہ طریقے کے بارے میں مولانا اشرف علی تھانوی v فرماتے ہیں: ’’ہاتھ کے ناخن اس ترتیب سے کتروانا بہتر ہے، دائیں ہاتھ کی انگشتِ شہادت سے شروع کرے اور چھنگلیاں تک بہ ترتیب کترواکر پھر بائیں چھنگلیاں پھر بہ ترتیب کٹوادے اوردائیں انگوٹھے پر ختم کرے اور پیر کی انگلیوں میں دائیں چھنگلیاں سے شروع کرکے بائیں چھنگلیاں پر ختم کرے، یہ ترتیب بہتر ہے اور اولیٰ ہے، اس کے خلاف بھی درست ہے۔‘‘ (بہشتی گوہر، حصہ یازدہم، ص:۸۳۰، ط:دار الاشاعت) ’’فتاویٰ شامی‘‘ میں ہے: ’’قلت: وفی المواہب اللدنیۃ قال الحافظ ابن حجر: إنہ یستحب کیفما احتاج إلیہ ولم یثبت فی کیفیتہٖ شیئ ولا فی تعیین یوم لہٗ عن النبی a وما یعزی من النظم فی ذٰلک للإمام علی ثم لابن حجر قال شیخنا: إنہ باطل۔‘‘ (ج:۶،ص:۴۰۶، ط:سعید) ’’حاشیۃ الطحطاوی علی مراقی الفلاح‘‘ میں ہے: ’’لکن أنکر الہیئۃ المذکورۃ ابن دقیق العید ، فقال: کل ذٰلک لا أصل لہٗ وإحداث استحباب لا دلیل علیہ وقبیح عندی بالعالم نعم البداء ۃ بیمنی الیدین ویمنی الرجلین لہا أصل وہو أنہٗ a کان یعجبہ التیامن فی طہورہٖ وترجلہٖ وفی شانہٖ کلہٖ متفق علیہ وکذا تقدیم الیدین علی الرجلین قیاساً علی الوضوء وما یعزی لعلی وغیرہٖ باطل۔‘‘ (ج:۱،ص:۵۲۵،ط: دار الکتب العلمیہ) فقط واللہ اعلم الجواب صحیح الجواب صحیح کتبہ ابوبکرسعید الرحمن محمد شفیق عارف ذبیح اللہ اختر تخصصِ فقہِاسلامی جامعہ علوم اسلامیہ علامہ بنوری ٹاؤن ۔۔۔۔۔ژ۔۔۔۔۔ژ۔۔۔۔۔ژ۔۔۔۔۔
