؎
بسم اللہ الرحمٰن الرحیم
۱۰ /۱۰ / ۶۲ ھ
برادرِ محترم ومکرم زید مجدکم!
بعد سلامِ مسنون عرض ہے، بحمد اللہ مع الخیر رہ کر مستدعیِ خیریتِ مزاجِ گرامی ہوں۔ سالِ گزشتہ مولانا عبد الحق صاحب نافع کے ذریعے احقر نے جناب سے استمزاج کرایا تھا کہ کیا آپ تعلقِ دارالعلوم منظور فرما سکتے ہیں؟ جناب نے اس وقت مجلسِ علمی کی خدمات اور اس کی غیر معمولی قدردانی کا عذر فرماتے ہوئے یہ ظاہر فرمایا تھا کہ بعض مفوضہ اُمور سال بھر سے کم میں پورے بھی نہیں ہوسکتے، اس لیے ایک سال تک تو کہیں جانا مشکل ہے۔ سال پورا ہونے کو آیا ہے اور دارالعلوم میں ایک عرصہ دراز سے احقر کا یہ جذبہ رہا ہے کہ قابل افراد کا اجتماع ہو، یہاں کے حضرات بحمد اللہ آپ کو فضلاء دارالعلوم میں ایک جوہرِ قابل سمجھتے ہیں، اس لیے جی چاہتا ہے کہ آپ بھی اس گلدستۂ علماء کا ایک پھول بن جائیں، اور اپنی قابلیت کو اس مرکزی ادارہ کی ترقی اور سود وبہبود میں صرف فرمائیں۔ جو بھی دارالعلوم کا پروردہ ہے، اس پر دارالعلوم کا حق ہے، اور اس حق سے جب وہ خود طلب کرے تو فضلاء کو حق شناسی کی ضرورت ہے۔ خدا کرے کہ آپ یہی جذبۂ خدمت لے کر یہاں کے کاموں کا ایک اہم جزو ثابت ہوں۔ کیا یہ ممکن ہے کہ آپ اور بھی کچھ نہیں تو کم از کم سال بھر کے لیے بصورتِ حصولِ رخصت ہی دارالعلوم میں تشریف لے آویں۔ یہ صورت محض آپ کے اطمینان کے لیے ہوگی، ورنہ دارالعلوم دعوتِ مطلقہ بھی دے سکتا ہے۔ بہرحال! اگر اس کا امکان ہے تو آپ کی مرضی معلوم ہونے پر بندہ مجلس میں اس کی تحریک کردے، تاکہ یہ چیز ضابطہ میں بھی آجائے، بندہ آپ کے جواب کا منتظر رہے گا۔ میرے خیال میں تصنیف کا کام یہاں رہ کر بھی ممکن ہے، یہ چیز علماء کی زینت ہے، اور وہ درس کے ساتھ بھی نبھ سکتی ہے۔(حاشیہ نمبر:1) اُمید ہے کہ مزاجِ گرامی بعافیت ہوگا۔ والسلام! احقر محمد طیب غفرلہ
مہتمم دارالعلوم دیوبند
حضرت المحترم زیدت معالیکم!
سلامِ مسنون نیازِ مقرون!
مکرمت نامہ مع ٹیپ ریکارڈ بدستِ مولوی عبد الواحد صاحب بلوچستانی شرفِ صدور لایا، اس توجہ فرمائی کا دل سے ممنون ہوں، حق تعالیٰ جناب کو جزائے خیر عطا فرمائے۔
میں ان شاء اللہ بقصدِ زیارتِ حرمین شریفین ۱۵ ؍اپریل سنہ ۶۰ ء یومِ جمعہ کو روانہ ہوں گا، بمبئی سے مظفری جہاز ۲۱؍ اپریل سنہ ۶۰ء کو روانہ ہوگا۔ دعا فرماویں کہ حق تعالیٰ کامیاب پہنچائے اور کامیاب واپس لائے، آمین!
جناب کے لیے ان شاء اللہ دل سے دعا کروں گا۔ میری طرف سے اساتذۂ موجودینِ وقت کی خدمات میں سلامِ مسنون واستدعاء ِدعا عرض ہے، یہاں بحمد اللہ بہ ہمہ وجوہ خیریت ہے۔
والسلام
محمد طیب غفرلہ (از دیوبند )
۱۴/ ۱۰/ ۷۹ھ
( حاشیہ نمبر:1 )حکیم الاسلام حضرت مولانا قاری محمد طیب قاسمی رحمہ اللہ کے اس خط سے خانوادۂ نانوتوی سمیت دارالعلوم دیوبند میں حضرت بنوریؒ کا عنفوانِ شباب ہی میں مقام ومرتبہ معلوم ہوتا ہے، اگرچہ تکوین کی کرشمہ سازی نے حضرت بنوری رحمہ اللہ کے لیے دار العلوم دیوبند تشریف لے جانا مقدر نہیں کیا، چنانچہ مختلف غیبی ومنامی اشارات اور استخاروں واستشاروں کے نتیجے میں انہوں نے کراچی آکر مدرسہ عربیہ اسلامیہ (حال جامعہ علومِ اسلامیہ بنوری ٹاؤن کراچی) کی بنیاد ڈالی، جس کی علمی وعملی خدمات کا اعتراف ہر خاص وعام نے کیا، حتیٰ کہ خود ام المدارس دارالعلوم دیوبند کے اکابر نے اس ادارہ کو سرمایۂ افتخار قرار دیا۔
