سلسلۂ مکاتیب حضرت بنوری رحمۃ اللہ علیہ
بسم اللہ الرحمٰن الرحیم
۸؍صفر۱۳۹۶ھ
مخدومِ گرامی مفاخر حضرت شیخ الحدیث زادھم اللہ برکاتٍ وتوفیقاً إلی الحسنات
تحیۃً وسلاماً وأدباً و احتراماً
وبعد: عجلت میں چند سطور لکھ رہا ہوں، ’’وخلق الإنسان من عجل‘‘ کا مصداق تو ہمیشہ سے رہا ہوں۔ جناب مولانا سید محی الدین شارق بقصدِ عمرہ جا رہے تھے، عریضہ اور دواء ارسال کرنے کا موقع قبل ا زوقت مل گیا، خدا کرے کہ آپ کی صحتِ مبارکہ بہت اچھی ہو اور مشتاقانِ فیوض خوب مالا مال ہوتے ہوں، عریضہ مستعجلہ شاید پہنچ گیا ہوگا۔ عزیزم محمد سلمہٗ کا قدم طالب علمی میں داخل تو ہو گیا ہے، لیکن ابھی قدم راسخ نہیں ہوا، اس کے لیے دعوات وتوجہات کی ضرورت ہوگی۔ چند دنوں سے میں بھی بدن میں دکھ، درد و تکلیف محسوس کر رہا ہوں، شاید بلغمی بخار کا اثر ہوگا، ہمت اور مشاغل پراس کا اثر پڑ رہا ہے۔
مسجدِ نبوی علیٰ صاحبہ الصلاۃ والسلام کے امام عبدالعزیز ۱۲ ؍فروری ۱۹۷۶ ء کو وزیرِ اوقاف کی دعوت پر ۱۸ ؍دن کے لیے پاکستا ن آرہے ہیں، ایک نمازِ جمعہ لاہور میں اور ایک اسلام آباد میں پڑھائیں گے اور حکومت نے مولانا مفتی محمد شفیع صاحب کے دار العلوم کی زیارت کو پروگرام میں رکھا ہے۔ آج کل حضرت مفتی صاحب کی طبیعت اچھی ہے، غنیمت ہے، البتہ کمر میں درد ہوگیا تھا، جس کا اب افاقہ ہے۔ ماہانہ ایک مجلس فقہی کا دوبارہ اجراء وتجدید کرائی گئی ہے، جس میں اجتماع ہوا کرے گا اور جدید مسائل زیرِ بحث آیا کرتے ہیں، فیصلہ کے بعدطبع کرائے جاتے ہیں، اس ماہ کےآخر میں بھی ان شاء اللہ اجتما ع ہوگا، حضرت مفتی صاحب اس میں شرکت فرماتے رہتے ہیں۔ اور کوئی قابلِ ذکر چیز نہیں، بجز اشتیاقِ ملاقات اور احتیاجِ دعوات۔ اگر میرا سلام روضۂ اقدس پر پیش فرمائیں تو میری سعادت ہوگی۔
محمد یوسف بنوری
عزیزم محمد سلمہٗ درخواستِ دعوات کے ساتھ سلامِ احترام ونیا ز پیش کرتاہے۔
------------------------
بسم اللہ الرحمٰن الرحیم
۶؍ربیع الآخر ۱۳۹۶ھ
عزیز نورچشم سید محمد بنوری وفقک اللہ لکل خیر وسعادۃ
السلام علیکم ورحمۃ اللہ وبرکاتہ
انتظار کے بعد مکتوبِ دوم ملا، پہلا نہ مل سکا، حضرت شیخ مدظلہم کا مکتوب بھی مل گیا، ’’الخیر فیما وقع‘‘، اگر حضرت شیخ کے پہلے دو مکتوب مل جاتے تو شاید روانگی تمہاری نہ ہوسکتی۔ بہرحال اللہ تعالیٰ مبارک کرے، ان لمحات کو غنیمت سمجھو اور ان اوقات کی قدر کرو، پوری توجہ ان باتوں کی طرف کرو، جن میں حضرت شیخ کی خوشنودی ہو۔ اگر ہوسکے تو اوپر مولانا انعام کریم کے ذریعہ مدرسہ کا کوئی کمرہ مل جائے تو تنہائی -مطالعہ و ذکر کے لیے مفید ہے- میسر آئے گی۔ مدرسہ سے باہر تو ممکن ہے اور آسان ہے، لیکن قرب و جوار کاجوفائدہ ہے وہ فوت ہوجائے گا۔ ہندوستان کے سفر میں معیت ضروری ہے، انڈیا کا اندراج پاسپورٹ میں کرالیں اور ویزہ مل جائے گا۔ ٹکٹ‘ جدہ سے جلد براہِ کراچی بنوالیں تو پی۲ سے نجات مل جائے گی۔ تمہاری آپا تمہیں بہت یاد کرتی اور بسااوقات روپڑتی ہے، ان کی صحت کے لیے بھی دعا کرتے رہنا۔ روضۂ اقدس پر حسب ذیل الفاظ میں میرا سلام پہنچایا کریں: ’’ السلام علیک یا سیدي و یا مولاي یارسول اللہ ! عن والدي محمد یوسف البنوريّ خادمِ مدرستک العربیۃ الإسلامیۃ راجیاً عنک ما تقرُّ بہ عینُہٗ في الدنیا والآخرۃ۔‘‘
اپنی خیریت اور مشاغل سے مطلع کرتے رہو۔
والسلام
محمد یوسف بنوری عفی عنہ
