محترم جناب مفتی رفیق احمد بالاکوٹی صاحب
السلام علیکم ورحمۃ اللہ وبرکا تہ
کیا فرماتے ہیں (محدثین کرام)
سوال:حضرت عائشہ رضی اللہ عنہا سے روایت ہے کہ رسول اللہ صلی اللہ علیہ وسلم نے فرمایا:’’ جوشخص اپنے بھائی (مسلمان) کی قبر کی زیارت کرتاہے اور اس کے پاس بیٹھتاہے،وہ اس سے مانوس ہوتاہے اوراس کے سلام کا جواب دیتاہے، یہاں تک کہ جانے والا اُٹھ کھڑا ہوجائے۔‘‘
مفتی صاحب! اس روایت سے یہ دلیل لینا کہ ’’ہر مردہ کے پاس جو مسلمان زیارت کے لیے آتاہے وہ اسے دیکھتا بھی ہے اور اس سے مانو س بھی ہوتاہے‘‘ درست ہے؟
زید کہتاہے کہ مردہ کے پاس جو بھی زیارت کے لیے آتا ہے، نہ ان کویہ مردہ دیکھ سکتاہے اور نہ ان کا سلام سن سکتاہے اور نہ ہی اس سے مانو س ہوتا ہے اور اس بارے میں جتنی بھی روایتیں بیان کی جاتی ہیں وہ سنداً درست نہیں۔
جمہور علماء کرام کے نزدیک تحقیقی بات کیا ہے؟ رہنمائی فرمائیں، نوازش ہوگی۔
مستفتی : حافظ دلاور کوہاٹی، (بقلم : محمد شیراز حقانی )
سماعِ موتٰی کا مسئلہ ان مسائل میں سے ہے جن میں خود صحابہ کرام رضوان اللہ علیہم اجمعین کا باہمی اختلاف رہا ہے، حضرت عبد اللہ بن عمر رضی اللہ عنہما سماعِ موتٰی کو ثابت قرار دیتے ہیں تو حضرت عائشہ رضی اللہ عنہا اس کی نفی کرتی ہیں، اس لیے دوسرے صحابہؓ و تابعینؒ بھی دوگروہ ہوئے ہیں، بعض اثبات کے قائل ہیں، بعض نفی کے۔ اتنی بات تو صحیح اور صریح احادیث سے ثابت ہے کہ بعض اوقات میں مردے زندوں کا کلام سنتے ہیں، لیکن یہ ثابت نہیں کہ ہر حال میں ہر شخص کے کلام کو ضرور سنتے ہیں، اس لیے سارے مالکی، شافعی، حنبلی اور احناف کی اکثریت اور اکابرینِ دیوبند کی اکثریت سماعِ موتٰی کی قائل ہے، سماعِ موتٰی کی طرح مردے کا سلام کا جواب دینا ، مانوس ہونا، اور قبر پر آنے والے کو پہچاننا بھی جمہور علماء کے ہاں ثابت ہے۔ حدیث شریف میں ہے:
’’عن أنس رضي اللّٰہ عنہ عن النبي صلی اللّٰہ علیہ وسلم قال : العبد إذا وضع قبرہٗ وتولّٰی وذہب أصحابہ حتی إنہٗ لیسمع قرعَ نعالہم۔‘‘ (الصحیح للبخاری، ج: ۱، ص: ۱۷۸، ط:قدیمی)
حضرت ابوہریرہ رضی اللہ عنہ کی حدیث کے الفاظ یہ ہیں:
’’إن المیت لیسمع حس النعال إذا ولوا عنہ الناس مدبرین۔‘‘ (شرح السنۃ،کتاب الجنائز، ج: ۵، ص: ۴۱۳، ط:المکتب الاسلامی، بیروت)
حضرت براء ابن عازب رضی اللہ عنہ کی حدیث کے الفاظ یہ ہیں:
’’قال: ’’وإنہ لیسمع خفق نعالہم إذا ولوا مدبرین۔‘‘ (سنن ابی داؤد، کتاب السنۃ، ج:۲، ص:۶۵۴، ط:میرمحمد)
دوسری روایت میں ہے:
’’حدثني نافع أن ابن عمر رضي اللّٰہ عنہما أخبرہٗ قال: اطلع النبي صلی اللّٰہ علیہ وسلم علی أہل القلیب ، فقال: وجدتم ما وعد ربکم حقا ، فقیل لہ: تدعو أمواتا فقال:ما أنتم بأسمع منہم ولٰکن لا یجیبون۔‘‘ (الصحیح للبخاری، ج:۱، ص:۱۸۳، ط:قدیمی۔ کذا روی عن انسؓ فی سنن النسائی، ج:۱، ص:۲۹۲، ط:قدیمی۔ و عن ابن عباس ؓفی التفسیر الماثور، ج:۱۸، ص:۲۲، ط:دارالفکر۔ و عن موسی ابن عقبۃ فی دلائل النبوۃ، ج:۳، ص:۱۱۷، ط:دارالکتب العلمیۃ)
’’أحکام القرآن للجصاصؒ‘‘ میں ہے:
’’عن ابن عباس ؓ’’ما من أحد یمر قبر أخیہ کان یعرفہ في الدنیا فیسلّم علیہ إلا رد اللّٰہ علیہ روحہٗ حتی یرد علیہ السلام۔‘‘ (احکام القرآن للجصاصؒ ، ج:۳ ،ص:۶۵ ، ط:ادارۃالقرآن)
’’کتاب الروح‘‘ میں ہے:
’’عن عائشۃؓ ’’ما من رجل یزور قبر أخیہ ویجلس عندہ إلا استأنس بہ ورد علیہ حتی یقوم۔‘‘ (کتاب الروح ، ج:۱، ص:۵، ط:دارالکتب العلمیۃ)
’’مرقاۃ المفاتیح‘‘ میں ہے:
’’إذ ثبت بالأحادیث أن المیت یعلم من یکفنہ ومن یصلی علیہ ومن یدفنہ۔‘‘ (مرقاۃ المفاتیح ،ج:۱، ص:۱۹۸، ط:امدادیہ)
’’حاشیۂ طحطاوی‘‘ میں ہے:
’’وقال ابن القیم: الأحادیث والآثار تدل علی أن الزائر حین جاء علم بہ المزور وسمع سلامہ وأنس بہ ورد علیہ ، عام في حق الشہداء وغیرہم۔‘‘ (حاشیۂ طحطاوی ، کتاب الصلاۃ،فصل فی زیارۃ القبور، ص:۶۲۰،ط:قدیمی)
’’فیض الباري‘‘ میں ہے:
’’واعلم أن مسألۃ کلام المیت وسماعہ واحدۃ ۔۔۔ أقول: والأحادیث في سمع الموات قد بلغت مبلغ التواتر ۔۔۔ فلا بد بالتزام السماع في الجملۃ ۔۔۔۔ فلذا قلت بالسماع في الجملۃ۔‘‘ (فیض الباری ، ج:۱، ص:۴۶۷، ط:حجازی، قاہرہ)
’’فتح الملھم‘‘ میں شیخ الاسلام شبیر احمد عثمانی ؒ فرماتے ہیں:
’’والذي تحصلنا من النصوص واللّٰہ أعلم أن سماع الموتٰی ثابت في الجملہ بالأحادیث الکثیرۃالصحیحۃ۔‘‘ (فتح الملھم ، ج:۲،ص:۴۷۹،ط:ادارۃ القرآن)
’’أحکام القرآن للتھانوی ؒ‘‘میں ہے:
’’والذي ذکرہ في الروح من طوائف أہل العلم وذکر ابن عبد البر أن الأکثرین علی ذلک یعنی سماعہم في الجملۃ ہو الحق الحقیق بالقبول وإلیہ یرشد صیغۃ القرآن وشان النزول وبہ تتوافق الروایات من الصحابۃؓ والرسول وہو مختار مشایخنا۔‘‘ (احکام القرآن للتھانوی ؒ،ج:۳،ص:۱۶۵،ط:ادارۃ القرآن)
مفتی فرید ؒ ایک سوال کے جواب میں رقم طراز ہیں:
’’واضح رہے کہ اکابر سماع الموتٰی کے متعلق باہم اختلاف رکھتے ہیں اور تحقیق یہ ہے کہ سماع الموتٰی راجح قول ہے۔‘‘ (فتاویٰ فریدیہ، ج:۱، ص:۴۳۸)
مفتی محمودؒایک سوال کے جواب میں فرماتے ہیں :
’’بعض علماء عدمِ سماع کو راجح قرار دیتے ہیں اور بعض سماع کو، ہمارے ہاں قولِ ثانی راجح ہے۔‘‘ (فتاوی مفتی محمود ؒ، ج:۱،ص:۵۶۹، ط:جمعیت پبلشر) فقط واللہ اعلم
الجواب صحیح الجواب صحیح کتبہ
محمد انعام الحق ابوبکر سعید الرحمن مدثر عباسی
الجواب صحیح الجواب صحیح متخصصِ فقہِ اسلامی
محمد شفیق عارف رفیق احمد جامعہ علوم اسلامیہ علامہ بنوری ٹاؤن
اضافہ وتفصیل از قلم مفتی رفیق احمد بالاکوٹی صاحب
’’سماعِ موتٰی‘‘ ۔۔۔۔۔۔قرنِ اول سے مختلف فیہ چلا آرہا ہے، جس مسئلہ میں صحابہ کرام رضی اللہ عنہم کا اختلاف منقول ہو تو وہاں حق و ہدایت کو کسی ایک جانب کے ساتھ خاص نہیں کیا جاسکتا، بلکہ ہر دو جانب کے بارے میں حق وہدایت کا احتمال وگمان رکھنا دینی اقتضاء ہے۔ ایسے مسائل کو زیادہ سے زیادہ راجح و مرجوح کا مسئلہ قرار دیا جاسکتا ہے اور جس کے ہاں جو رائے راجح قرار پائے وہ صاحب ِرائے اپنی رائے کی وجوہِ ترجیح بیان کر سکتا ہے اور اپنا رجحان بھی بتا سکتا ہے۔اگر کوئی صاحب ِرائے ایسے مسائل کے بارے میں اس حد سے آگے بڑھنا چاہے تو اُسے راہِ اعتدال سے متجاوز و منحرف کہنے میں اصولِ شرع کے مطابق کوئی مانع نہیں ہوگا۔
سو ہمارے اور ہمارے مشائخ کے نزدیک سماعِ موتٰی راجح ہے اور ان کے ہاں اس رجحان کی وجوہِ ترجیح مندرجہ ذیل ہیں:
۱:- عدمِ سماع پر جن نصوص سے استدلال کیا جاتا ہے وہ استدلال واضح اور صریح نہیں ہے، بالخصوص قرآن کریم کی آیت ’’إِنَّکَ لَا تُسْمِعُ الْمَوْتٰی‘‘ یا اس جیسی آیات سے استدلال کیا جاتا ہے اور اس مضمون کی آیات کو عدمِ سماع کے اہم ترین اور مضبوط تر دلائل کے طور پر سمجھا اور سمجھایا جاتا ہے، جبکہ ان آیات سے استدلال دو وجہوں سے مرجوح ہے:
ایک وجہ تو یہ ہے کہ ایسی آیات میں ’’اِسماع‘‘ (سنانے) کی نفی ہے، ’’سماع‘‘ (سننے) کی نفی نہیں ہے۔ دعویٰ عدمِ سماع کا اور دلیل عدمِ اِسماع کی، دونوں کے درمیان مطابقت نہیں ۔
دوسری وجہ اس استدلال کے ناتمام ہونے کی یہ ہے کہ قرآن کریم میں جہاں کہیں بھی قرآن کریم کے مخاطبین کا عدمِ سماع ذکر فرمایا گیاہے، وہ بالاتفاق عدمِ استفادہ و عدمِ قبول سے کنایہ و استعارہ ہے۔ اس سے کسی نے عدمِ سماعِ عرفی مراد نہیں لیا، بلکہ اس نوع کے عدمِ سماع والے مخاطبین تو مادی کانوں کے مالک تھے، خوب سنتے تھے،بلکہ کبھی کبھار ناگواری کے اظہار کے لیے اپنی انگلیاں بھی اپنے کانوں میں ڈال لیا کرتے تھے، اس کے باوجود ایسے مخاطبین سے سماع کی نفی کا مطلب دعوتِ الٰہیہ کو قبول کرنے کے بجائے رد کرنا ، اعراض کرنا اور استفادہ نہ کرنا ہے۔ اس سے یہ بات بھی واضح ہوئی کہ ’’إِنَّکَ لَا تُسْمِعُ الْمَوْتٰی‘‘ میں زندہ مخاطبین کو مردوں کی مانند قرار دینا عدمِ استفادہ میں ہے، نہ کہ عدمِ سماع میں، کیونکہ عدمِ سماع کو اگر مشبہ بہ قرار دیا جائے تو پھر تشبیہ تام نہیں ہوسکتی، کیوں کہ منکرینِ سماع کے بقول مردہ توسنتا ہی نہیں، جبکہ زندہ مخاطبین بحسن وخوبی سنتے ہیں، پھر وجہ تشبیہ سماعِ عرفی کی بجائے کچھ اور ہی ہو سکتی ہے ، اور وہ جمہور اہلِ علم کے نزدیک یہ ہے کہ جس طرح مردوں کے حق میں دعوت مفید نہیں، اسی طرح ان ڈھیٹ مزاج مخاطبین کے حق میں بھی دعوت مفید نہیں ہے۔ دعوت قبول کرنے کے لیے مُردوں کا اختیار ختم ہوچکا ہے اور آپ کے مخاطبین اپنے اختیار کو صحیح استعمال نہیں کررہے، عدمِ استفادہ دونوں میں قدرِ مشترک ہے۔
۲:- قرآن کریم میں مُردوں کے عرفی سماع یا عدمِ سماع کا صراحت کے ساتھ کہیں بھی ذکر نہیں ہے، جہاں سے جتنا استدلال کیا جاتا ہے وہ استدلال مع الاحتمال سے زیادہ قوت و اہمیت کا حامل نہیں ہے،اس لیے زیرِ بحث قضیے میں ذخیرۂ احادیث کی طرف رجوع کیا جائے گا۔ ذخیرۂ احادیث میں یہ امر مکمل وضاحت کے ساتھ ملتا ہے اور زیادہ تر بلکہ پوری وضاحت کے ساتھ یہ بیان پایا جاتا ہے کہ عوام و خواص ، تمام اموات فی الجملہ سنتے ہیں۔ قلیبِ بدر،قرعِ نعال اور احادیثِ سلام وغیرہا میں سماعِ موتٰی کا موقف پوری وضاحت ، صراحت اور جِدکے ساتھ مذکور ہے ۔ ایسی تمام روایات کے مضمون کا جائزہ لیتے ہوئے محدث کشمیری رحمۃ اللہ علیہ نے انہیں تواتر کے درجہ تک پہنچایا ہے اور اسی بنا پر اپنا اور اپنے مشائخ کا راجح مسلک سماعِ موتٰی کا نقل فرمایا ہے، چنانچہ علامہ کشمیری رحمۃ اللہ علیہ فرماتے ہیں:
’’أقول: والأحادیثُ في سماع الأمواتِ قد بلغت مَبْلغَ التواتر۔ وفي حدیثٍ صحَّحہ أبو عمرو: أن أحدًا إذا سَّلَّم علی المیتِ فإِنہ یَرُدُّ علیہ، ویعرِفُہٗ إن کان یَعْرِفُہٗ في الدَّنیا - بالمعنی- وأخرجہ ابن کثیر أیضًا وتردَّد فیہ، فالإِنکار في غیر مَحَلِّہٖ، ولا سیما إذا لم یُنقل عن أحدٍ من أئمتنا رحمہم اللّٰہ تعالٰی، فلا بد من التزام السماع في الجملۃ، وأما الشیخ ابن الہمام رحمہ اللّٰہ تعالٰی فجعلَ الأَصْل ہو النَّفي، وکلَّ مَوْضِع ثبت فیہ السَّماعُ جَعَلہٗ مستثنًی ومقتصِرًا علی المَوْرد۔
قلت: إذن ما الفائدۃ في عُنوان النَّفي؟ وما الفَرق بین نفي السَّماع، ثُم الاستثناء في مواضِعَ کثیرۃٍ، وادعاء التَّخصِیص، وبین إثبات السَّماع في الجملۃ مَعَ الإِقرار بأنا لا ندري ضوابِطَ أسماعِہم، فإِنَّ الأحیائَ إذا لم یَسْمعُوا في بَعْضِ الصُّوَرِ فمن ادَّعی الطَّرْد في الأموات، ولذا قلتُ بالسماع في الجملۃ، بقي القرآنُ فأَمْرُہ صَعْبٌ، قال تعالٰی: ’’إِنَّکَ لاَ تُسْمِعُ الْمَوْتٰی‘‘ (النمل:۸) ، وقال: ’’وما أَنْتَ بِمُسْمِعٍ مَنْ فِيْ الْقُبُوْرِ‘‘ (فاطر: ۲۲) ، وہو بظاہِرِہٖ یدلُّ علی النَّفْي مُطلقًا، فقیل بالفرق بین السَّماع والإِسماع، والمَنْفي ہو الثاني دون الأَول، والمطلوبُ ہو الأوَّل دونَ الثاني، وأجاب عنہ السّیوطي:
سماعُ مَوْتی کلام الخلْقِ قَاطبۃً
قد صَحَّ فیہا لنا الآثارُ بالکُتُبِ
وآیۃُ النفي معناہا سَمَاعُ ہدیً
لا یَسْمَعُون ولا یُصْغون للأَدَبِ
قلت : نَزَل الشیخُ رحمہ اللّٰہ تعالٰی فیہا علی الغَرض۔ وحاصل الآیۃ علی طَوْرہ: أنَّ ہؤلاء الکفارَ کالمَوْتَی، فلا تَنْفع ہدایتُک فیہم، لأن نَفْعہا إنَّما کان في حیاتِہم و قد مَضَی وَقْتُہا، کذٰلک، ہؤلاء وإنْ کانوا أحیاء إلَّا أنَّ ہدایتَک غیرُ نافعۃ لہم، لکونِہم مِثْلَ الأمواتِ في عدم الانتفاع، فلیس الغرضُ منہ نفيَ السماع بل نفي الانتِفاع۔قلت: عدمُ السَّماع والسَّمْع والاستِماعِ کُلّہا بمعنی عَدَم العمل، لأنَّ السَّمْع یکونُ للعمل، فإِذا لم یَعْمَل بہ فکأنَّہ لم یَسْمَعْہ، تَقولُ، قلتُ لہ مرارًا أن لا یترکَ الصلاۃَ ، لکنہٗ لا یَسْمَعُ کلامي، أي لا یعمل بہ، یُقال في الفارسیۃ نشنود، یعنی عمل نمی کند، فلو قال الشیخ رحمہ اللّٰہ تعالٰی: إنَّ مَن في القبور لا یعملُون لدخل الکلامُ في اللغۃ، ولم یبق تأویلا، بل الأحسنُ أن یُقال:’’مانتے نہیں‘‘ فإِن قلت: إِنَّ الأمواتَ إذا ثَبَت لہم السَّماعُ، فھل لہم الانتفاع بہ أیضًا أو مجردُ سماعِ الصوتِ فقط۔‘‘ (فیض الباری، باب قول المیت وہو علی الجنازۃ: قدمونی: ۳/۴۲، ط: علمیہ)
۳:-سماعِ موتٰی کے مسئلہ کا بہترین تجزیہ حضرت مولانا مفتی محمود حسن گنگوہی رحمۃ اللہ علیہ نے اپنے فتاویٰ میں پیش فرمایا ہے،اہلِ علم کے لیے وہ بھی مناسب رہنمائی ہے۔ حضرت کے فتوی کا حاصل یہ ہے کہ زیرِ بحث مسئلہ میں تین اُمور کو جدا گانہ انداز میں غور کیا جائے تو اہلِ علم علمی اُلجھن کا شکار نہیں ہوں گے اور اگر علماء بحث کرنا چاہیں تو انہیں منقح علمی بحث میں مدد بھی ملے گی۔فرماتے ہیں کہ: یہاں
ایک امر ہے: ’’استماعِ موتٰی‘‘ دوسرا امر ہے : ’’اِسماعِ موتٰی‘‘
تیسرا مر ہے: ’’سماعِ موتٰی‘‘
(الف) ’’استماعِ موتٰی‘‘ کا مطلب ہے مردہ اپنے اختیار و ارادہ سے جب چاہے جس کے بارے میں چاہے اس کا کلام سن سکتا ہے، اس کاشاید کوئی بھی قائل نہیں ۔
(ب) ’’اِسماعِ موتٰی‘‘ کا مطلب ہے کہ سنانے والا جب چاہے، جو چاہے وہ ہر حال میں ہر مردے کو سنانے کی قدرت و طاقت رکھتا ہے،اس کا بھی بظاہر اس دنیا میں کوئی مسلمان قائل نہیں، بلکہ اسماع کی نفی، نصِ قرآنی کی عبارت ’’إِنَّکَ لَا تُسْمِعُ الْمَوْتٰی‘‘ سے ثابت ہے، یہ نفی قرآن میں متعدد مقامات پر موجود ہے،اس خطاب کے مخاطب خود صاحبِ وحی تھے، جب نبی مرسل سے اسماع (سنانے) کی نفی ہے تو کسی اور کی کیا مجال ہے کہ وہ اپنے اختیار و منشا کے تحت کسی مرد ے کو سناسکے، یہ منصوصی ہدایت کے منافی ہے۔
(ج) رہا ’’سماعِ موتٰی‘‘، اس کے بارے میں قرآن کریم کا کوئی واضح صریح بیان نہیں ملتا، جن آیات سے بالعموم سماعِ موتٰی کی نفی پر استدلال کیا جاتا ہے وہ ایک تو اسماعِ موتٰی کے بیان پر مشتمل ہیں جن کا کوئی قائل ہی نہیں ہے۔دوسرا یہ کہ عالمِ برزخ کو عالمِ مشاہدہ پر قیاس کرنا بھی درست نہیں ہے۔(۱)
۴:- البتہ احادیث میں یہ بیان اپنے اختلافی نقطہائے نظر کے ساتھ موجود ہے، اس لیے سماعِ موتٰی کے مسئلے کو احادیثِ مبارکہ کی روشنی میں دیکھنے کی ضرورت ہے، کہیں اور سے استدلال مفید یا مناسب نہیں ہے۔ اور احادیث میں ’’سماعِ موتٰی ‘‘ کو جتنا صراحت کے ساتھ ذکر فرمایا گیا ہے، سماعِ موتٰی کی نفی اس درجہ صراحت اور وضاحت کے ساتھ مذکور نہیں ہے۔ اس لیے احادیثِ مبارکہ کی رو سے سماعِ موتٰی کا موقف زیادہ راجح معلوم ہوتا ہے۔
اس بات کی تائیداس امر سے بھی ہوتی ہے کہ سماعِ موتٰی کی نفی میں سب سے جلی موقف حضرت ام المومنین سیدہ عائشہ صدیقہ رضی اللہ عنہا سے منسوب ہے، جن سے خود میت کو سلام کرتے وقت ردِ روح کی روایت بھی منقول ہے۔ نیز حضرت عائشہ رضی اللہ عنہا روضۂ اطہر کے احاطے میں حضرت عمر رضی اللہ عنہ کی تدفین کے بعد پردے کا اہتمام بھی فرماتی تھیں، جو کہ فی الجملہ ’’سماع ‘‘کے امکان بلکہ میت کی طرف سے رویت کے اثبات کی دلیل بھی ہے۔ (۲)
۵:- ہمارے مشائخ کے ہاں سماعِ موتٰی کا مسئلہ جب راجح ومرجوح کا مسئلہ ہے تو ایسے مسائل میں ترجیحی وجوہ کو خارجی عوارض اور ماحولیاتی عوامل کے تناظر میں بھی جانچا جا سکتا ہے،فی زمانہ اگر دیکھا جائے تو اعتزالِ قدیم کی مختلف نئی شکلیں وجود پذیر ہیں، جن کے ہاں شرعی مسائل کے قبول یا رد کے لیے عقلی معیاروں کو آخری حکَم قرار دیا گیا ہے۔ اس بابت نصوص جس پائے کی بھی ہوں، ان کا بیان کتنا ہی صریح کیوں نہ ہو اعتزالِ جدید (عقل پرست طبقہ) ایسی روایات کو بے معنی اور ان کے مطالب و مدلولات کو افسانہ قرار دیتا ہے اور یہ طبقہ‘قبر کی حقیقت، اس کے احوال، جزا وسزا، قیامِ قیامت، دوزخ اور بہشت جیسے تمام حقائق کو حق ماننے کے لیے عقل کی کسوٹی قائم کیے ہوئے ہے، ایسے ماحول و مزاج میں ان روایات و نصوص اور آثار و اقوال کو راجح قرار دینا زیادہ مناسب و موزوں ہے، جو قبر کی حقیقت، قبر کی زندگی، اس کی جزا و سزا کی واقعیت کو ثابت کر رہی ہوں، اس لیے فی زمانہ ضرورت اس امر کی ہے کہ قبر کی زندگی اور اس کے متعلقہ حقائق کو عقل پرستوں کی عقلیاتی زور آزمائی سے بچانے کے لیے قبر کی زندگی اور اس کے لوازم ثابت کرنے والی روایتی رائے اور اس کی بنیادبننے والی نصوص کو راجح قرار دیا جائے ، یہ ترجیح مقتضائے شرع کے عین موافق ہے، چنانچہ قبر میں مردے کے سننے، سلام کا جواب دینے اور آنے جانے والوں کو پہچاننے کا موقف‘ قبر کی زندگی اور اس کے لوازم کو ثابت کرنے میں فی زمانہ بہترین ذریعہ ہے،بلکہ ذریعہ کے درجہ میں ناگزیر موقف بھی کہہ سکتے ہیں۔
۶:-سماعِ موتٰی کی نفی پر ماضی قریب یا بعید میں جن اہلِ علم نے زور دیا ہے، ان کے بارے میں حسنِ ظن پر مبنی رائے قائم کی جائے تو وہ یہ ہے کہ ان اہلِ علم کا یہ مؤقف غلبۂ توحید کی وجہ سے شرکیہ اوہام کے قطع کے تحت تھا ،ظاہر ہے کہ توحید کے مقابلے میں شرک کا معاملہ انتہائی سنگین نوعیت کا ہے، قبر پرستی، مردوں کے بارے میں خدائی اختیار ات وتصرفات کے اعتقاد کے تحت نداء و پکار کی سنگینی، کسی حد تک شدت کی متقاضی بھی ہو سکتی ہے۔
یہ شدت اگر نفیِ شرک کی حد تک رہتی تو اس کا حکم اور ہوتا، مگر یہ شدت سماعِ موتٰی کی رائے کی مرجوحیت سے نکل کر اس رائے کی بنیاد بننے والی روایات کی ہر طرح سے نفی اور اس رائے کے حاملین پر شرک وکفر کے فتوی تک جا پہنچی، جو شرعی مسئلے میں شرعی اقتضاء کی بجائے ایمانی خطرہ بن گئی، حالانکہ یہ شدت پسنداہلِ علم بھی جانتے ہیں کہ سماعِ موتٰی کے قائلین اہلِ علم میں سے از اول تا حال کوئی بھی اس بنیاد پر سماعِ موتٰی کا قائل نہیں ہے کہ وہ بت پرستانہ نظریہ کے تحت اہلِ قبور سے حاجت روائی کی استدعا کرتا ہو، بلکہ اس طبقے کے صوفیاء اہلِ علم زیادہ سے زیادہ استفاضہ کے قائل ہوتے ہیں، جبکہ استفاضہ تو مخصوص اہلِ قبور سے ہوتا ہے، عام اموات سے تو نہیں ہوتا، اگر ہماری شدت پسندی کے پیشِ نظر محض نفی شرک ہوتی تو پھر محض استفاضہ کی نفی پر زور دینا چاہیے تھا، سماع موتٰی کی ثابت شدہ روایات کے انکار یا نامناسب رد کی صورت میں تنازع کھڑا کرنا تو قطعاً مناسب نہیں تھا، اگر انصاف سے دیکھا جائے تو ماضی میں ہمارے جو اہلِ علم توحید بیانی کی شہرت کے ساتھ دنیا سے گزرے ہیں وہ سب تقریباً صاحبِ نسبت صوفیاء تھے اور صوفیاء استفاضہ کا انکار کر ہی نہیں سکتے، ہاں! نوعیت اور تعبیر کا فرق ہو سکتا ہے۔
الغرض سماعِ موتٰی کی نفی فی زمانہ جن لوگوں کا مشغلہ ہے وہ محض ایک علمی رائے اور روایاتِ سلف کا مقتضاء ہونے سے زیادہ شدت پسندی اور کئی مسلمہ حقائق کی نفی یا پامالی پر منتج ہورہی ہے، مقابلے میں سماعِ موتٰی کی رائے بالخصوص علماء حق علمائے دیوبند اور ان کے پیروکاروں کے ہاں کسی شرکیہ عقیدے یا مشرکانہ مقاصد کے لیے نہیں، بلکہ ان نصوص و روایات کے مقتضاء کے طور پر ہے جو قرنِ اول سے تاحال جمہور اہلِ علم کے نزدیک راجح اور قوی چلی آرہی ہے، اس لیے ہم سماعِ موتٰی کی رائے اور اس کے دلائل کو راجح سمجھتے ہیں۔
بایں ہمہ ہم اپنی رائے اور اس کے دلائل کی تمام تر ترجیحات پر یقین کامل ہونے کے باوجود اس موقف کو اپنا اول و آخر موضوع نہیں سمجھتے، اس پر دینِ اسلام کے ارکان میں سے کسی رکن کے قیام و بقاء کا عقیدہ نہیں رکھتے، اس لیے ہم خود بھی اور دوسری سمت کے انتہاء رساں احباب سے بھی یہی عرض کرنا چاہتے ہیں کہ اس وقت اُمتِ مسلمہ بالعموم اور مسلکِ حق مسلکِ دیوبند سے نسبت رکھنے والے علماء کرام بالخصوص سماعِ موتٰی کے مسئلہ سے بڑھ کر کئی سنگین مسائل کی زد میں ہیں، ہمیں قومی و بین الاقوامی سطح کے طوفانی مسائل کے سامنے متحد اور سینہ سپر ہونے کی ضرورت ہے، اہلِ علم کو چاہیے کہ وہ عوام کے درمیان فرائض اور ارکان کی بابت پائی جانے والی بیماریوں کے علاج کے درپے ہوں۔ ان کمزوریوں کی اصلاح کے لیے اپنی توانائیاں صرف فرمائیں اور موت پر یقین کامل رکھتے ہوئے موت کے بعد پوچھے جانے والے عقائد و اعمال کی فکر کریں اور اس فکر کو زندہ کروائیں۔ اگر اللہ تعالیٰ کی توفیق سے قبر وقیامت کی اچھی تیاری ہو سکی تو سماعِ موتٰی کا مسئلہ یہاں سے زیادہ قبر میں اچھے طریقے سے سمجھ آجائے گا، ان شاء اللہ!
اللّٰہم أرنا الحق حقا وارزقنا اتباعہ وأرنا الباطل باطلا وارزقنا اجتنابہ
وصلی اللّٰہ علٰی سیدنا محمد وعلٰی آلہٖ و أصحابہٖ أجمعین
۱:-فتاویٰ محمودیہ کی عبارت ملاحظہ ہو:
’’یہاں تین چیزیں غور طلب ہیں: ایک اسماع، دوم استماع، سوم سماع۔ اسماع کی نفی صراحۃً کلام اللہ شریف میں مذکور ہے: ’’إِنَّکَ لَا تُسْمِعُ الْمَوْتٰی‘‘ اور ’’وما أَنْتَ بِمُسْمِعٍ مَنْ فِيْ الْقُبُوْرِ‘‘ یعنی حضرت نبی اکرم صلی اللہ علیہ وسلم بذات خود مردوں کو نہیں سنا سکتے، تابدیگراں چہ رسد۔استماع کا حاصل یہ ہے کہ مردے کان لگا کر خود کسی کی بات سنیں۔ جب جسم سے روح جدا ہو جائے، تو یہ جسم کا کان نہیں سن سکتا، کیونکہ اصل ادراک کرنے والی چیز روح ہے اور قوتِ سامعہ اس کے لیے آلۂ ادراک ہے، جب روح نے اس جسم کو اور اس جسم میں لگے ہوئے آلات کو ترک کردیا، تو اس کے لیے یہ آلات کار آمد نہیں ہیں۔ جس طرح میت قوتِ باصرہ، لامسہ، باطشہ وغیرہ سے کام نہیں لے سکتی، اسی طرح قوتِ سامعہ سے بھی کام نہیں لے سکتی، وہٰذا ظاہر لا یخفٰی۔ سماع کا حاصل یہ ہے کہ کوئی خارجی آواز اللہ تعالیٰ اپنی قدرت سے میت کو ادراک کرادیں جس میں نہ صاحبِ صوت کو دخل ہو، نہ میت کو، تو یہ بالکل ممکن ہے، حق تعالیٰ کی قدرت سے خارج نہیں، اس کے لیے شواہدِ کثیرہ موجود ہیں۔ حدیث شریف میں ہے کہ جب میت کو قبر میں رکھ کر ساتھی لوٹتے ہیں تو: ’’إنہ لیسمع قرع نعالہم‘‘۔ اس میں نہ میت کے کان لگانے اور اختیار کو دخل ہے، نہ اصحابِ نعال کے اِسماع اور میت تک آواز پہنچانے کا دخل ہے، اس کے باوجود سماع ثابت ہے۔قبرستان میں پہنچ کر سلام کرنا مسنون ہے، اتنی کثیر مٹی کے اندر مدفون میت تک اس معمولی آواز کا پہنچا دینا صاحبِ آواز کے قابو سے باہر ہے، اس کے باوجود سماع ثابت ہے، إلٰی غیر ذٰلک من الروایات۔ عالم برزخ کو عالم مشاہدہ پر قیاس کرکے محض عقلی طور پر کوئی قطعی بات ثابت کرنا بھی مشکل ہے، لأن قیاس الغائب علی الشاہد لا یجوز کما صرح بہ الرازي إمام المتکلمین في مواضع لا تحصٰی، جن روایات سے نفی معلوم ہوتی ہے، وہاں استماع کی نفی ہے، نہ کہ سماع کی۔ فقط واللہ سبحانہ تعالیٰ اعلم۔‘‘ (فتاویٰ محمودیہ: ۱/۵۵-۵۵۳،ط:جامعہ فاروقیہ)
۲:- دونوں روایات ملاحظہ ہوں :
’’عَنْ عَائِشَۃَ رَضِیَ اللّٰہُ عَنْہَا ، قَالَتْ : قَالَ رَسُولُ اللّٰہِ - صَلَّی اللّٰہُ عَلَیْہِ وَسَلَّمَ - : مَا مِنْ رَجُلٍ یَزُوْرُ قَبْرَ أَخِیْہِ وَیَجْلِسُ عِنْدَہٗ إِلَّا اسْتَأْنَسَ بِہٖ وَرَدَّ عَلَیْہِ ، حَتّٰی یَقُوْمَ۔‘‘ (کتاب القبور لابن ابی الدنیاالقرشی، باب معرفۃ الموتٰی بزیارۃ الاحیاء ، ص:۲۰۱، ط:مکتبۃ الغرباء الاثریۃ، المدینۃ النبویۃ۔ تفسیر ابن کثیر :۶/۳۲۵، دارطیبۃ للنشر والتوزیع۔ الروح- ابن قیم الجوزیۃ:۱/۵، دارالکتب العلمیۃ بیروت۔ مسند أحمد بن حنبل- :۶/۲۰۲، مؤسسۃ قرطبۃ - القاہرۃ)
= ’’عن عائشۃؓ قالت : کنت أدخل بیتي الذي دفن فیہ رسول اللّٰہ صلی اللّٰہ علیہ و سلم وأبي فأضع ثوبي، فأقول: إنما ہو زوجي وأبي، فلما دفن عمر معہم فواللّٰہ ما دخلت إلا وأنا مشدودۃ علی ثیابي حیاء من عمرؓ۔‘‘ (المستدرک علی الصحیحین للحاکم مع تعلیقات الذہبی فی التلخیص: ۳/۶۳، دارالکتب العلمیۃ۔ مجمع الزوائد ومنبع الفوائد ، محقق: ۷/۳۳۵، دارالفکر بیروت)
