بِسْمِ اللَّهِ الرَّحْمَنِ الرَّحِيم

17 رمضان 1445ھ 28 مارچ 2024 ء

بینات

 
 

حرمین میں مقتدی کا امام سے آگے ہونا

حرمین میں مقتدی کا امام سے آگے ہونا

کیا فرماتے ہیں مفتیان کرام اس مسئلہ کے بارے میں کہ: حرمین میں مقتدی کا نماز میں یا جنازہ میں امام سے آگے ہونا اگرچہ مجبوراً ہو تو اس بارے میں شریعت کا کیا حکم ہے؟ مستفتی: الطاف، کراچی الجواب حامدًا ومصلیًا صورتِ مسؤلہ میں خانہ کعبہ کی چار جہتوں میں سے جس جہت کی طرف رُخ کرکے امام نماز پڑھا رہا ہے، اس جہت میں اگر کوئی مقتدی امام سے اتنی مقدار آگے بڑھتا ہے کہ اس کی ایڑھی امام کی ایڑھی سے آگے ہوجائے اور وہ کعبہ سے امام کی بنسبت زیادہ قریب ہوجائے تو ایسے مقتدی کی نماز فاسد ہوجاتی ہے۔اور وہ مقتدی حضرات جو اُس جہت پر نہیں جس جہت کی طرف امام رُخ کرکے نماز پڑھا رہا ہے، بلکہ دوسری جہات کی طرف ہیں، ان میں سے اگر کوئی مقتدی امام کی بنسبت کعبہ سے زیادہ قریب ہو تو ایسے مقتدی کی نماز صحیح اور درست ہے۔ فتاویٰ عالمگیری میں ہے: ’’وإذا صلی الإمام فی المسجد الحرام تحلق الناس حول الکعبۃ وصلوا صلٰوۃ الإمام فمن کان منہم أقرب إلٰی الکعبۃ من الإمام جازت صلٰوتہٗ إذا لم یکن فی جانب الإمام کذا فی الہدایۃ۔‘‘ (ومما یتصل بذٰلک الصلٰوۃ فی الکعبۃ، ج:۱، ص:۶۵، طبع: رشیدیہ) فتاویٰ شامی میں ہے: ’’(قولہٗ إن لم یکن فی جانبہٖ) أما إذا کان أقرب إلیہا الإمام فإن کان متقدما علٰی الإمام بحذائہٖ فیکون ظہرہٗ إلٰی وجہ الإمام ۔۔۔۔ أو کان علٰی یمین الإمام أو یسارہٖ تقدما علیہ من تلک الجہۃ ویکون ظہرہ إلٰی الصف الأول الذی مع الإمام ووجہہٗ إلٰی الکعبۃ فلایصح اقتداء ہٗ لأنہ إذا کان متقدمًا علیہ لایکون تابعًا لہٗ۔‘‘                                          (الصلوٰۃ فی الکعبۃ، ج:۲، ص:۵۵۵، طبع: سعید) حاصل یہ ہے کہ حرمین بالخصوص حرم مکی میں جو مقتدی عام نماز یا جنازہ کی نماز میں امام کی جہت سے امام سے ذرا بھی آگے ہوں گے ان کی نماز فاسد ہوگی۔ مقتدیوں کو اس کا خیال رکھنا ضروری ہے، بالخصوص موجودہ وقت میں بعض ائمہ کعبہ سے دور چبوترے میں کھڑے ہوتے ہیں، اس حالت میں جو لوگ امام کے آگے ہوں گے ان کی نماز بلاشبہ فاسد اور واجب الاعادہ ہوگی۔                                                                     فقط واللہ اعلم     الجواب صحیح           الجواب صحیح         الجواب صحیح                    کتبہ   ابوبکر سعید الرحمن       محمد انعام الحق       شعیب عالم                    طٰہٰ امین                                              تخصص فقہ اسلامی جامعہ علوم اسلامیہ علامہ بنوری ٹاؤن

تلاشں

شکریہ

آپ کا پیغام موصول ہوگیا ہے. ہم آپ سے جلد ہی رابطہ کرلیں گے

گزشتہ شمارہ جات

مضامین