سوال

میں ایک کمپیوٹر پروفیشنل ہوں، میری عمر اس وقت 26 سال ہے۔ ایک سال ہوا ہم ایک نئے گھر میں شفٹ ہوئے ہیں، اس سے پہلے میر ی پیدائش سے پچیس سال کی عمر تک ہم ایک مشترکہ گھر میں چچا وغیرہ کے ساتھ جوائنٹ فیملی سسٹم کے تحت رہائش پذیر تھے، ایک کمرے میں ہم اور برابر والے کمرے میں میرے چچا رہتے تھے اور میرے چچا کی کوئی نرینہ اولاد نہیں، تو میری چچی باہر کے کاموں کے لیے  مجھے ہی بلاتی تھیں۔ چند سال پہلے مجھ پر شہوت کا شدید غلبہ تھا اور میں اپنی چچی کو بھی شہوت بھری نظروں سے دیکھا کرتا تھا۔ چند دن ہوئے مجھے حرمتِ مصاہرت کے بارے میں پتا چلا ہے، مجھے اپنی چچی کو شہوت بھری نظروں سے دیکھنا تو یاد ہے، شہوت کے ساتھ ہاتھ لگانا یاد نہیں، لیکن شک ہے کہ کوئی چیز پکڑاتے وقت یا باہر سے کوئی چیز لا کر دیتے وقت شہوت کے ساتھ کہیں ہاتھ نہ لگ گیا ہو۔

اب میں اپنی چچا زاد بہن سے شادی کرنا چاہتا ہوں، تو کیا میرے لیے اپنی چچا زاد بہن سے نکاح کرنا جائز ہے؟ یا حرام ہے؟

ایک گزارش یہ بھی ہے کہ: جواب ویب سائٹ پر اپلوڈ کرنے کے علاوہ اگر تحریر طور پر لکھ کر ( جس طرح عام فتوی کی صورت ہے) اور اسکین کر کے پی ڈی ایف (PDF)یا تصویرکی صورت میں بھی عنایت فرمادیں تو عین نوازش ہوگی۔

جواب

صرف شہوت سے ظاہری اعضاء کو دیکھنے سے حرمت مصاہرت ثابت نہیں ہوتی،نیز اگر شہوت کے ساتھ چھونایاد نہیں تو محض شک سے  حرمت ثابت نہیں ہوگی،اس لیے آپ اپنی چچازاد بہن سے نکاح کرسکتے ہیں۔البتہ یاد رہے کہ جس طرح شہوت کے ساتھ چھوناحرام ہے اسی طرح شہوت کے ساتھ دیکھنا بھی حرام اور گناہ کبیرہ ہے،اس فعل پر توبہ استغفار کرنا چاہیے۔

مجمع الانھر میں ہے:

"(وكذا) يوجبها (المس) ولو بحائل ‌ووجد ‌حرارة ‌الممسوس سواء كان عمدا، أو سهوا، أو خطأ أو كرها۔۔(و) كذا يوجبها (نظره إلى فرجها الداخل) وهو المدور وعليه الفتوى كما في أكثر المعتبرات."

(كتاب النكاح، باب المحرمات، ج:1، ص:327، ط:دار إحياء التراث العربي)

فقط واللہ اعلم

تحریری اور تفصیلی جواب چاہتے ہیں تو جامعہ کے دارالافتاء میں وہ سوال تحریری طور پر جمع کراکے جواب حاصل کریں  یا بذریعہ ای میل مندرجہ ذیل ایڈریس پر بھیجیں۔

 [email protected]