سوال

اگر کوئی  بندہ گناہ کبیرہ کرلے زنا یا لواطت کرے اور اس کے بعد توبہ کرلےسچے دل سے  تو  آخرت میں اس گناہ کی سزا دی  جائے گی یا معاف ہو جائے گی ؟

جواب

صورتِ  مسئولہ میں  صدقِ  دل، پختہ  عزم،  ندامت كے ساتھ کی جانے والی توبہ  سے کبیرہ گناہ بھی معاف ہو جاتے ہیں ، اورآخرت میں  اس پر مواخذہ نہیں ہو گا ، حدیث شریف میں آتا ہے کہ    " ’گناہ سے (صدقِ دل سے) توبہ کرنے والا اس شخص کی طرح (پاک و صاف ہوجاتا) ہے جس نے کوئی گناہ کیا ہی نہ ہو   "       اور توبہ کر نے والا  اللہ تعالیٰ  پیارا اور محبوب بن جاتا ہے۔

واضح رہے کہ  تو بہ کی تین شرائط ہیں :  ایک یہ کہ اس گناہ سے مکمل کنارہ کشی اختیار کی جائے ، دوم : یہ کہ دل سے خوب ندامت ہو    ،سوم : یہ آئندہ نہ کر نے کا عزم ہو۔ لہذا  ان شرائط  کا اہتمام کرے تو اللہ تعالی  بڑے بڑے  گناہوں کو  بھی معاف فرمادیتے ہیں ۔

مزید دیکھیے:

بڑے سے بڑے گناہ گار کی توبہ بھی قبول ہے

اللہ  تبارک وتعالی کا ارشاد ہے :

’’اِنَّ اللَّهَ یُحِبُّ التَّوَّابِینَ وَ یُحِبُّ المُتَطَهِّرِینَ‘‘ [البقرة:222]

ترجمہ: ’’یقینًا اللہ تعالیٰ محبت رکھتے ہیں توبہ کرنے والوں سے اور محبت رکھتے ہیں پاک صاف رہنے والوں سے۔‘‘ (بیان القرآن)

سنن ابن ماجه ميں هے :

"عَنْ أَبِي عُبَيْدَةَ بْنِ عَبْدِ اللَّهِ عن أبيه، قَالَ: قَالَ رَسُولُ اللَّهِ - صَلَّى اللَّهُ عَلَيْهِ وَسَلَّمَ -: "‌التَّائِبُ مِنْ الذَّنْبِ كَمَنْ لَا ذَنْبَ لَهُ".

(ابواب الزھد، باب ذکر التوبہ،320/5،دارالرسالۃ العالمیۃ)

الموسوعة الفقهية الكويتيهمیں ہے:

"أركان وشروط التوبة:۔۔۔ الإقلاع عن المعصية حالا، والندم على فعلها في الماضي، والعزم عزما جازما أن لا يعود إلى مثلها أبدا."

(ص:120، ج:14، ط:دار السلاسل)

کفایت المفتی میں ہے :

" جس گناہ سے سچی تو بہ کر لی جا ئے  وہ گناہ معاف ہو جا تا ہے ، یعنی پھر اس کا موا خذہ نہیں ہو گا  ،  کامل اور سچی تو بہ کے بعد  گناہ  بالکل باقی نہیں رہتا "۔

(کتاب العقائد ، 282/1، دار الاشعات )

فقط واللہ اعلم