سوال

کیا کوئی تھریڈنگ، اور لیزر ٹریٹمنٹ کے حکم کی وضاحت کر سکتا ہے، کیا یہ ’’تغییر خلق الله‘‘ میں اور  ’’نهي عن المتنصات‘‘ میں آئے گا ؟  نیز پیر کے بالوں کا صاف کرنا کیسا ہے؟

جواب

خواتین کے لیے بناؤ سنگھار اور زیب وزینت اختیار کرنے میں شرعی تقاضوں کا لحاظ رکھنا ضروری ہے اور اس بات کا اہتمام کرنا ضروری ہے کہ ان کے کسی طرزِ عمل سے اللہ تعالیٰ اور اس کے رسول صلی ﷲعلیہ وسلم کی ناراضی  لازم نہ آئے، زیب وزینت اور بناؤ سنگھار میں  جن امور کی شریعت میں قطعی طور پر ممانعت ہے،  انہیں کرنا کسی صورت میں عورت کے لیے جائز نہیں،  چاہے وہ شوہر ہی کے لیے کیوں نہ ہو، اور بناؤ سنگھار کے جو امور شرعی حدوداور جائز درجہ میں ہیں ان میں بھی مقصود شوہر کو خوش کرنا ہو، نہ کہ  نامحرم مردوں کو دکھانا یا دوسری عورتوں کے سامنے اترانا ہو، اگر شوہر کو خوش کرنے کے لیے بناؤ سنگھار کرے گی تو اس کو ثواب ملے گا اور اگر نامحرم مردوں کو دکھانے یا فخر کی نیت سے بناؤ سنگھار کرے گی تو گناہ گار ہوگی۔

مذکورہ تمہید کے بعد آپ کے سوال کا جواب درج ذیل ہے:

خواتین کے لیے اپنے چہرے کے غیر معتاد بال مثلاً داڑھی کے جگہ، مونچھ،  پیشانی وغیرہ کے بال یا کلائیوں اور پنڈلیوں کے بال یا دیگر جسم کے بال  صاف کرنا جائز ہے،  البتہ ان بالوں کو نوچ کرنکالنا مناسب نہیں،  کیوں کہ اس میں بلاوجہ اپنے جسم کو اذیت دیناہے،  کسی پاؤڈر وغیرہ کے ذریعہ صاف کر لیا جائے تو زیادہ بہتر ہے۔ تھریڈنگ میں چوں کہ یہی عمل ہوتا ہے اس لیے اسے مناسب طریقہ نہیں کہا جاسکتا ہے۔

نیز مسلمان عورت کے لیے دوسری مسلمان عورت کے سامنے ناف سے لے کر گھٹنوں سمیت حصہ چھپانا فرض ہے، شرعی عذر کے بغیر ان اعضاء میں سے کوئی عضو دوسری عورت کے سامنے کھولنا یا کسی عورت کا دوسری عورت کے ان اعضاء کو چھونا جائز نہیں ہے۔ لہٰذا ستر والے مقام کے بال صاف کروانا یا ویکس کرانا کسی دوسری عورت سے جائز نہیں ہے۔  ہاں ستر کے علاوہ  دیگر اعضاء (مثلاً: چہرہ وغیرہ) کا دوسری عورت سےبھی  ویکس کروانا جائز  ہے۔

باقی عورت کے لیے حسن کی خاطر بھنویں بنانا (دھاگا یا کسی اور چیز سے)یا اَبرو کے اطراف سے بال اکھاڑ کر باریک دھاری بنانا جائز نہیں، اس پر حدیث میں لعنت وارد ہوئی ہے،  اسی طرح  دونوں ابرؤں کے درمیان کے بال زیب وزینت کے حصول کے لیے کتروانا جائز نہیں،  البتہ اگر  اَبرو بہت زیادہ پھیلے ہوئے ہوں تو ان کو درست کرکے  عام  حالت کے مطابق   (ازالۂ عیب کے لیے )معتدل کرنے کی گنجائش ہے۔

اسی طرح مرد کے لیے بھی ڈاڑھی کے علاوہ یعنی جبڑوں کی ہڈی کے اوپر کے بال صاف کرانا جائز ہیں۔

جہاں تک لیزر ٹریٹمنٹ کی بات ہے تو لیزر سے مراد ایسی لائٹ  ہے جسے مختلف طریقوں سے سیٹ کر کے انرجی کے طور پر استعمال کیا جاتا ہے ۔ اس میں جسم کی پوری جلدکے مختلف مسائل (مثلاًچہرے کے بالوں کاخاتمہ اور جھریوں ) کو ٹھیک کیا جاتا ہے ۔جولوگ دھوپ میں زیادہ جاتے ہوں یا کسی اور وجہ سے ان کے ہاتھوں،  پاؤں یا جلد کے کسی اورحصے پر نشانات بن جائیں، انہیں لیزر تھیراپی تجویز کی جاتی ہے ۔اس کے علاوہ بعض لوگ جسم پر ٹیٹو یا کوئی نام لکھواتے ہیں، جب ان کا اس سے دل بھر جاتا ہے تو انہیں ختم کروانے کے لیے لیزر ٹریٹمنٹ کرائی جاتی ہے ۔

لہذا اوپر ذکر کردہ  شرعی حدود وضوابط میں رہتے ہوئے اس کی بھی گنجائش ہے۔ یہ بھی واضح رہے کہ جسم پر ٹیٹو بنوانا (جسم گدوا کر اس میں نیل یا رنگ بھرنا) بھی جائز نہیں ہے، اس کی ممانعت بھی حدیثِ پاک میں موجود ہے۔ 

اسی طرح زیر ناف بالوں کے علاوہ  پاؤں کے بال صاف کرنا عورتوں کے لیے جائز ہیں، مردوں کے لیے ایسا کرنا بہتر نہیں ہے۔

حاشية رد المحتار على الدر المختار (6/ 373):
"( والنامصة إلخ ) ذكره في الاختيار أيضاً، وفي المغرب: النمص نتف الشعر ومنه المنماص المنقاش اهـ ولعله محمول على ما إذا فعلته لتتزين للأجانب، وإلا فلو كان في وجهها شعر ينفر زوجها عنها بسببه ففي تحريم إزالته بعد؛ لأن الزينة للنساء مطلوبة للتحسين، إلا أن يحمل على ما لا ضرورة إليه؛ لما في نتفه بالمنماص من الإيذاء.  وفي تبيين المحارم: إزالة الشعر من الوجه حرام إلا إذا نبت للمرأة لحية أو شوارب فلا تحرم إزالته بل تستحب".  فقط واللہ اعلم