سوال

اگر کوئی آدمی اپنی اولاد کو جائیداد میں سےعاق کر دیتا ہے تو اس کی شرعی حیثیت کیا ہے؟ آیا والدین کےلیے اپنی اولاد کوجائیدادسے عاق کرنا جائز ہے یا نہیں؟ اگر جائز ہے تو کس وجہ سے؟

جواب

اپنی اولاد  میں سے کسی کو  اپنی جائے داد  سے  عاق کرناجائز نہیں ہے اور نہ ہی شرعاً اس کی کوئی حیثیت ہے،  اگر کسی نے اپنی اولاد  میں سے کسی کو اپنی جائیداد سے عاق بھی کردیا تو اس سے وہ  اپنے شرعی حصہ سے محروم نہیں ہوگا، بلکہ شرعی حصہ بدستور اس کو ملے گا۔

مشكاة المصابيح  میں ہے:

’’عَنْ أَنَسٍ قَالَ: قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ: «مَنْ قَطَعَ مِيرَاثَ وَارِثِهِ قَطَعَ اللَّهُ مِيرَاثَهُ مِنَ الْجَنَّةِ يَوْمَ الْقِيَامَةِ» . رَوَاهُ ابْنُ مَاجَهْ‘‘.  (1/266، باب الوصایا، ط: قدیمی)۔ فقط واللہ اعلم