سوال

ہم تین  بھائی اور دو بہنیں ہیں، والدین حیات ہیں،  ہمارے گھر کی قیمت پچاس لاکھ روپے ہے، والدین چاہتے ہیں کہ اپنی زندگی میں ہی اولاد کے درمیان تقسیم کردیں۔

والدین نے اپنے حساب سے یوں تقسیم کی ہے کہ  پچاس لاکھ روپے میں سے چھ لاکھ ایک بہن کو اور چھ لاکھ دوسری بہن کو اور بقیہ  رقم تینوں بھائیوں میں برابر تقسیم کررہے ہیں۔  والدین اپنے ایک بیٹے جس کی شادی نہیں ہوئی اس کے ساتھ رہنا چاہتے ہیں ، پھر شادی کے بعد تینوں بیٹوں کے پاس باری  باری ایک ایک مہینہ رہیں گے۔

شرعی طریقہ کے حساب سے کیا یہ تقسیم درست ہے؟ جبکہ اس تقسیم  پر سب بھائی بہن راضی ہیں،  کیا اس تقسیم پر ہماری قیامت میں پکڑ تو نہیں ہوگی؟

جواب

ہر شخص اپنی زندگی میں اپنی جائیداد کا خود مالک  ومختار ہوتا ہے، وہ ہر جائز تصرف اس میں کرسکتا ہے، کسی کو یہ حق نہیں  ہے کہ اس کو اس کی اپنی ملک میں تصرف  کرنے سے منع کرے ،نیز والد ین کی زندگی میں اولاد وغیرہ کا اس کی جائیداد میں   کوئی حق  و حصہ  نہیں  ہوتا،  اور نہ ہی کسی کو مطالبہ کا حق حاصل  ہوتا،  تاہم اگر صاحبِ جائیداد اپنی  زندگی میں  اپنی جائیداد  خوشی  ورضا سے اولاد کے درمیان تقسیم کرنا چاہے تو کرسکتا ہے، اور اپنی زندگی میں جو جائیداد تقسیم کی جائے  وہ ہبہ (گفٹ) کہلاتی ہے اور اولاد کے درمیان ہبہ (گفٹ) کرنے میں برابری ضروری ہوتی ہے، رسول اللہ ﷺ نے اولاد کے درمیان ہبہ کرنے میں برابری کرنے کا حکم دیا ، جیساکہ نعمان بن بشیر رضی اللہ تعالی عنہ کی  روایت میں ہے:

'' وعن النعمان بن بشير أن أباه أتى به إلى رسول الله صلى الله عليه وسلم فقال: إني نحلت ابني هذا غلاماً، فقال: «أكل ولدك نحلت مثله؟» قال: لا قال: «فأرجعه» . وفي رواية ...... قال: «فاتقوا الله واعدلوا بين أولادكم»''۔

(مشکاۃ  المصابیح، 1/261، باب العطایا، ط: قدیمی)

ترجمہ:حضرت نعمان ابن بشیر  رضی اللہ عنہ سے روایت ہے کہ (ایک دن ) ان کے والد (حضرت بشیر رضی اللہ عنہ) انہیں رسول کریمﷺ کی خدمت میں لائے اور عرض کیا کہ میں نے  اپنے اس بیٹے کو ایک غلام ہدیہ کیا ہے، آپ ﷺ نے فرمایا : کیا آپ نے اپنے سب بیٹوں کو اسی طرح ایک ایک غلام دیا ہے؟، انہوں نے کہا :  ”نہیں “، آپ ﷺ نے فرمایا: تو پھر (نعمان سے بھی ) اس غلام کو واپس لے لو۔ ایک اور روایت میں آتا ہے کہ ……  آپ ﷺ نے فرمایا: اللہ تعالی سے ڈرو اور اپنی اولاد کے درمیان انصاف کرو۔

(مظاہر حق، 3/193، باب العطایا، ط: دارالاشاعت)

اور صاحبِ جائیداد کی طرف سے اپنی زندگی میں اپنی اولاد کے درمیان ہبہ کرنے کا شرعی  طریقہ یہ ہے کہ   اپنی جائیداد میں سے  اپنے  لیے   جتنا چاہے رکھ لے؛ تاکہ بوقتِ ضرورت کام آئے، اور بقیہ مال اپنی  تمام  اولاد میں برابر تقسیم کردے، یعنی جتنا بیٹے کو دے اتنا ہی بیٹی کو دے،  نہ کسی کو محروم کرے اور نہ ہی بلاوجہ کمی بیشی کرے، ورنہ گناہ گار ہوگا اور اس صورت میں ایسی تقسیم شرعاً غیر منصفانہ کہلائے گی۔

البتہ  کسی بیٹے یا  بیٹی کو  کسی معقول وجہ کی بنا پر  دوسروں کی بہ نسبت   کچھ زیادہ  دینا چاہے تو دےسکتا ہے،  یعنی کسی کی شرافت  ودین داری یا غریب ہونے کی بنا پر  یا زیادہ خدمت گزار ہونے کی بنا پر اس کو  دوسروں کی بہ نسبت کچھ زیادہ دے تو اس کی اجازت ہے۔

لہذا صورت مسئولہ میں  بہتر تو یہ تھا کہ  پچاس لاکھ روپے میں سے والدین اپنے لیے کچھ حصہ رکھ لیتے اور بقیہ رقم کو پانچ حصوں میں تقسیم کرکے تمام اولاد میں برابری کے ساتھ تقسیم کردیتے، لیکن اگر مذکورہ تقسیم پر تمام اولاد راضی ہیں اور بیٹیوں کو کوئی اعتراض نہیں ہے تو شرعا یہ تقسیم بھی جائز ہے۔

حضور صلی اللہ علیہ وسلم کا ارشاد ہے:

  (فاتقوا اللہ واعدلوا بین اولادکم)

(مشکاۃالمصابیح، ص۔261)

ترجمہ:اللہ سے ڈرو اور اپنی اولاد کے درمیان(ھبہ،تحائف،(Gift) وغیرہ  میں برابری کرو۔ 

ردامحتار میں ہے:

"وفي الخانية لا بأس بتفضيل بعض الأولاد في المحبة لأنها عمل القلب، وكذا في العطايا إن لم يقصد به الإضرار، وإن قصده فسوى بينهم يعطي البنت كالابن عند الثاني وعليه الفتوى ولو وهب في صحته كل المال للولد جاز وأثم"

(ردالمحتار جلد ۔5 ص۔696)

فتاوی ھندیہ میں ہے:

"ولو وهب رجل شيئا لأولاده في الصحة وأراد تفضيل البعض على البعض في ذلك لا رواية لهذا في الأصل عن أصحابنا، وروي عن أبي حنيفة - رحمه الله تعالى - أنه لا بأس به إذا كان التفضيل لزيادة فضل له في الدين، وإن كانا سواء يكره وروى المعلى عن أبي يوسف - رحمه الله تعالى - أنه لا بأس به إذا لم يقصد به الإضرار، وإن قصد به الإضرار سوى بينهم يعطي الابنة مثل ما يعطي للابن وعليه الفتوى هكذا في فتاوى قاضي خان وهو المختار، كذا في الظهيرية."

(کتاب الھبة ،ص:391،ج:4،  ط:رشیدیة)

فقط واللہ اعلم