سوال

وتر کی  نماز تین رکعات ہے یا ایک ؟

جواب

فقہائے حنفیہ کے نزدیک  دلائل کی روشنی میں وتر تین رکعتیں ایک سلام کے ساتھ پڑھنا سنت ہے، اس حوالے سے امام نسائی رحمہ اللہ  نے  ”سنن نسائی“  میں سند  کے ساتھ  حضرت ابی بن کعب  رضی اللہ عنہ کی روایت درج کی ہے  : ”رسول اللہ صلی اللہ علیہ وسلم وتر کی پہلی رکعت میں {سبح اسم ربك الاعلی}، دوسری رکعت میں {قل یا ایها الکافرون} اور تیسری رکعت میں {قل هو الله احد} پڑھتے تھے اور تینوں رکعتوں کے آخر میں سلام فرماتے تھے“ ۔ اسی پر صحابہ رضی اللہ عنہم میں سے حضرت عمر،حضرت عبداللہ بن مسعود اور حضرت انس رضی اللہ عنہم اور دیگر حضرات کا عمل رہا ہے۔

اس مسئلے کی  مزید تفصیل محد ث العصر حضرت مولانا یوسف بنوری رحمہ اللہ کی  ’’جزء الوتر‘‘اور   علامہ زیلعی رحمہ اللہ کی”نصب الرایة“ اور مولانا ظفر احمد عثمانی رحمہ اللہ  کی ”إعلاء السنن“ میں ملاحظہ کی جاسکتی ہے۔ فقط واللہ اعلم